रुपन्देहीको बुटवल स्थित एक सरकारी बाल गृहमा आश्रित किशोरले आत्महत्या गरेका छन्। जितगढी स्थित बाल कल्याण गृह आश्रममा रहेका १४ बर्षीय आयुष बिकले आत्महत्या गरेको प्रहरीले जनाएको छ।
इलाका प्रहरी कार्यलय बुटवलका अनुसार उनले आफु सुत्ने कोठाको पंखामा तान्नको पासो लगाएर आत्महत्या गरेका हुन्।
आयुष जितेश्वर मावि कक्षा ६ मा अध्ययनरत थिए। उनको स्थायी ठेगाना देवदह नगरपालिका शितल नगर हो। आमा र बाबुले दोस्रो बिबाह गरे पछि एक्लिएका उनि बाल गृह आइपुगेका थिए।
आइतबार बिहान सबैसंग बसेर गफ गरेका आयुषले पटक पटक ‘ आज मेरो अन्तिम दिन ‘ भन्ने गरेको त्यहाँ आश्रित बालबालिकाले सुनाए।
आयुष प्रेम सम्बन्धमा रहेको उनको दिदीको भनाई छ। ‘ बारम्बार केटिको कुरा गर्थ्यो ‘ उनले भनिन्, ‘नपाए मर्छु भनि रहन्थ्यो।’ यस अघि आयुष बाल गृहको छतबाट हामफाली भाग्ने गरेको र खोजेर ल्याउने गरिएको गृहका निमित्त कार्यालय प्रमुख कमल ज्ञवालीले बताइन्।
बाल गृहमा १९ जना बाल बालिका छन्। यहि आयुष कि दिदि र भाई पनि छन्। आइतबार आयुषले छतबाट प्रेमिकासंग गफ गरेको र ‘ छतबाट खसेर मृत्यु हुन्छ कि नाईं ‘भनि सोधेको भाईले बताएको खबर आजको कान्तिपुरमा उल्लेख छ।
