काठमाडौँ – कोरस डान्सरबाट अभिनेत्री बनेकी वर्षा राउतले आफ्नो करिअरको १० वर्ष पूरा गरेकी छिन्। वर्षाले मोडलिङमा ‘रोजेको मैले’ गीतमार्फत डेब्यु गरेकी थिइन् र त्यसपछि फिल्म ‘नाइँ नभन्नु ल ४’ बाट अभिनय क्षेत्रमा प्रवेश गरिन्। पछिल्ला वर्षमा उनले ‘छक्का पञ्जा’ सिरिज, ‘जात्रा’, ‘महाजात्रा’, ‘तेलभिसा’ लगायत दर्जनौं फिल्ममा काम गरिसकेकी छिन्।
वर्षा बताउँछिन्, “पहिले स्क्रिप्ट पढ्ने बानी थिएन, अब चाहिँ भूमिका बुझेर काम गर्छु। धेरै राम्रो कलाकार र निर्देशकसँग काम गर्दा सिक्ने अवसर पाएँ।” उनले आफूलाई प्रायः गृहिणी वा श्रीमती भूमिकामा देखाइएको स्वीकारेकी छिन् र फरक भूमिकामा काम गर्ने इच्छा पनि व्यक्त गरिन्।
भर्खरै रिलिज हुने फिल्म ‘हर्ष’मा वर्षाको स्क्रिन टाइम बढी छ। उनले महिला निर्देशक र सहयोगी कलाकारसँग सहज अनुभव पाएको बताइन्। विवाद र आलोचनापछि वर्षा अहिले बोल्न र सामाजिक सञ्जालमा पोस्ट गर्दा बढी सर्तक भइसकेकी छिन्।
‘हर्ष’ पारिवारिक मूल्य र सम्बन्धको महत्व देखाउने फिल्म हो, जसले दर्शकमा खुशीका आँसु ल्याउने आशा राखिएको छ।
