काठमाडौँ – ऊर्जा, भौतिक पूर्वाधार तथा शहरी विकासमन्त्री कुलमान घिसिङले सडक निर्माणको कामलाई अहिलेको मौसम अनुकूल रहेको भन्दै सम्बन्धित निकायलाई तीव्रता दिन आग्रह गरेका छन्। सडक विभागका महानिर्देशक, आयोजना प्रमुख र निर्माण व्यवसायीसँगको छलफलमा मन्त्री घिसिङले बाँकी निर्णय तत्काल गर्न, जनशक्ति र उपकरण थप गरी आगामी असारभित्र सडक विस्तार सम्पन्न गर्नेगरी काम अघि बढाउन निर्देशन दिएका छन्। भक्तपुरको सूर्यविनायकदेखि काभ्रेपलाञ्चोकको धुलिखेलसम्मको सडक विस्तारको समग्र प्रगति अहिले ५० प्रतिशत पुगेको छ। अरनिको राजमार्गअन्तर्गत १५.८ किलोमिटर सडक ६ लेनमा विस्तार गर्न दुई प्याकेजमा काम भइरहेको छ। सूर्यविनायक–साँगा खण्डको प्रगति ४५ प्रतिशत र साँगा–धुलिखेल खण्ड ५५ प्रतिशत पुगेको छ। दुबै प्याकेजमा टेवा पर्खाल तथा नाली निर्माण ९५ प्रतिशत पूरा भइसकेको छ।
मन्त्री घिसिङले बनेपा बजार क्षेत्रमा देखिएको समस्या समाधानका लागि स्थानीय प्रमुखसँग पनि सहयोग र सहजीकरणको आग्रह गरेका छन्। चालु आर्थिक वर्षमा आयोजनाका लागि ७० करोड रुपैयाँ विनियोजन गरिएको छ भने ४ अर्ब रुपैयाँ थप बजेट माग गरिएको छ।
