भरतपुर, भदौ १७ । विद्यार्थीहरुको नोबेल पुरस्कार भनेर चिनिने ‘हल्ट प्राइज’ प्रेसिडेन्सी कलेजमा आयोजना हुने भएको छ। प्रेसिडेन्सी कलेजमा एमबीए अध्ययनरत विद्यार्थी कृष्णप्रसाद चापागाईं ‘हल्ट प्राइज’ प्रेसिडेनसी कलेज को क्याम्पस निर्देशक छनोट भएसँगै प्रेसिडेन्सी कलेज र पुर्वान्चल विश्वविद्यालयसँग सम्बन्धन प्राप्त चितवन अन्य कलेजका विद्यार्थीहरुको लागि विश्वभरीका विद्यार्थीहरुसँग प्रतिस्पर्धा गर्ने ढोका खुलेको हो ।
विश्वभरका दुई हजारभन्दा बढी विश्वविद्यालयका विद्यार्थीले भाग लिने उक्त कार्यक्रममा हल्ट फाउन्डेसन, हल्ट इन्टरनेशनल बिजनेस स्कुल र संयुक्त राष्ट्रसङ्घले संयुक्तरुपमा आयोजना गरिने कार्यक्रममा विद्यार्थीहरुलाई सामजिक विषयको शीर्षक दिएर सो शीर्षकमा उत्कृष्ट सामाजिक व्यवसायको योजना बनाउने विद्यार्थीको समूहले दश लाख अमेरिकी डलर जित्ने कलेजले जनाएको छ ।
कार्यक्रमको कृष्णप्रसाद चापागाईं क्याम्पस निर्देशक र सविन पौडेल सह निर्देशक रहेको कमिटीमा स्वेता दुलाल, संचिता श्रेष्ठ, विवेक राज श्रेष्ठ, पानस डल्लाकोटी, अनुस्का पौडेल र सिलोन रेग्मी रहनेछन्।
खाद्य सुरक्षा, पानी, उर्जा, शिक्षाजस्ता विषयमा आधारित रहेर हरेक वर्ष अमेरिकी पूर्वराष्ट्रपति बिल क्लिन्टन्ले भिन्न शीर्षक छान्ने गर्दछन् । प्रेसिडेन्सी कलेजमा प्रथम भएको विद्यार्थीको समूह क्षेत्रीय हुँदै अन्तिम चरणसम्म पुग्न सक्नेछन् ।
विद्यार्थीहरुले तीन वा चार जनाको एउटा समूह बनाई सहभागी हुन सक्नेछन् । धेरै विद्यार्थीको सहभागिताको लागि विभिन्न क्याम्पसहरुमा हल्ट प्राइजबारे जानकारीमूलक कार्यक्रमहरु गर्ने योजनामा रहेको क्याम्पस निर्देशक चापागाईंले बताए । डिसेम्बर १५ भित्र हुने उक्त कार्यक्रमको तयारी सुरु गरिएको छ ।
