भरतपुर–२९, चितवन । भरतपुर महानगरपालिका–२९ स्थित चौकी डाँडा, काबिलास गढी नजिकै नेपाल टेलिकमको नयाँ टावर निर्माण कार्य अघि बढेको छ।
टावर निर्माण स्थलमा अहिले फाउन्डेसन तथा जग निर्माणको काम भइरहेको छ। निर्माणस्थलमा आवश्यक संरचना तयार गर्ने र टावरका लागि फाउन्डेसनको जग ढलान गर्ने कार्य जारी रहेको छ।
चौकी डाँडामा नेपाल टेलिकमको टावर निर्माण हुन थालेसँगै यस क्षेत्रमा मोबाइल नेटवर्क तथा सञ्चार पहुँच थप सहज हुने अपेक्षा गरिएको छ। सञ्चार पूर्वाधारको विस्तारले स्थानीय बासिन्दाका साथै चौकी डाँडा भ्रमण गर्ने पर्यटकलाई समेत प्रत्यक्ष लाभ पुग्ने विश्वास गरिएको छ।
प्राकृतिक सौन्दर्य र पर्यटनको प्रचुर सम्भावना बोकेको चौकी डाँडा पछिल्लो समय काबिलास गढी, स्टार फल क्रेटर, भ्यु टावर, शिखरको मन्दिर, आकर्षक सिँढी, प्याराग्लाइडिङको सम्भावना तथा चितवन र गैंडाकोटको मनोरम दृश्य**का कारण पर्यटकीय गन्तव्यका रूपमा अघि बढिरहेको छ।
सडक तथा सञ्चार पूर्वाधार विस्तारसँगै चौकी डाँडाको पर्यटन विकासमा समेत थप गति आउने अपेक्षा गरिएको छ। विशेषगरी इको रिसोर्ट, होमस्टे, फार्मस्टे, क्याम्पिङ, ग्ल्याम्पिङ, क्याफे तथा साहसिक पर्यटनका क्षेत्रमा निजी लगानीको सम्भावना बढ्दै गएको छ।
स्थानीय पूर्वाधार क्रमशः विकास हुँदै जाँदा चौकी डाँडा भरतपुरबाट नजिकै पुग्न सकिने शीतल पहाडी पर्यटन गन्तव्यका रूपमा स्थापित हुने सम्भावना थप बलियो बनेको छ।
भरतपुर महानगरपालिकाले आफ्नो पर्यटकीय गन्तव्यहरू मध्ये चौकी डाँडालाई पनि समेटेको छ। प्राकृतिक सौन्दर्य, शीतल हावापानी, ऐतिहासिक तथा धार्मिक सम्पदा, साहसिक पर्यटन र वरपरका मनोरम दृश्यका कारण चौकी डाँडा पछिल्लो समय भरतपुरको महत्वपूर्ण सम्भावनायुक्त Hill Tourism Destination का रूपमा अगाडि बढिरहेको छ।
आँपटारीबाट मुग्लिन नारायणगढ बाटो अन्तर्गत भोर्ले हुँदै चौकी डाँडा करिब २६ किलोमिटर दूरीमा रहेको छ। यससँगै अर्को महत्वपूर्ण सडक सम्पर्क पनि छ। काबिलास रिसोर्ट हुँदै पात्लेबासबाट चौकी डाँडा जोड्ने सडक। हाल पहिरोका कारण यो सडक अवरुद्ध रहेको भए पनि उक्त सडक पुनः सञ्चालनमा आउन सकेमा आँपटारीबाट करिब १६ किलोमिटरमै चौकी डाँडाको शीतल पहाडी वातावरणमा पुग्न सकिने सम्भावना छ।
कल्पना गर्नुहोस्—भरतपुरको गर्मीबाट छोटो यात्रामै यस्तो ठाउँ, जहाँ मौसम चिसो छ, बिहान–साँझ शीतल हावा चल्छ, राति सिरक ओढेर सुत्नुपर्ने वातावरण हुन्छ र खुला आकाशमुनि Campfire गर्दै रात बिताउन सकिन्छ।
