ए–डिभिजन फुटबल क्लबहरूको एन्फा गेट अगाडि धर्ना, लिग स्थायित्वको माग

काठमाडौँ । ए–डिभिजन फुटबल क्लबहरूले विभिन्न माग राख्दै शुक्रबार अखिल नेपाल फुटबल संघ (एन्फा)को सातदोबाटोस्थित कार्यालय अगाडि धर्ना दिएका छन्। एन्फासँग भएको सहमति कार्यान्वयन गर्नुपर्ने, लिगको वार्षिक साइकल पूर्ण रूपमा चलाउनुपर्ने र एएफसी क्लब लाइसेन्सिंग प्रणाली लागू गर्नुपर्ने मागसहित क्लब प्रतिनिधिहरू बिहानैदेखि एन्फा गेट अगाडि बसेका हुन्।

हिमालयन शेर्पा क्लबका अध्यक्ष कर्मा छिरिङ शेर्पाले हाल घरेलु फुटबल अनिश्चित हुँदै गएको भन्दै स्पष्ट र स्थायी लिग संरचना आवश्यक रहेको बताए। “राष्ट्रिय लिग पनि हुँदैछ, शहीद स्मारक ए–डिभिजन लिग पनि, बी–डिभिजन पनि—सबै एक वर्षभित्रै हुनुपर्छ,” उनले भने, “लिगको एक वर्षको साइकल पूरा नहुँदा क्लबहरूको योजना, लगानी र खेलाडीको करियर सबै प्रभावित छन्।”एन्फाले आज बिहान १० बजेका लागि क्लबहरूलाई छलफलमा बोलाएको भए पनि क्लबहरू भने बिहान ९ बजेदेखि नै धर्नामा बसेका थिए। क्लबहरूको प्रदर्शनलाई लक्षित गर्दै एन्फा गेट अगाडि सुरक्षाकर्मीहरू तैनाथ गरिएको थियो। धर्नामा सहभागीहरूले “लिग समयमै गर”, “सम्झौता कार्यान्वयन गर”, “अन्तर्राष्ट्रिय मापदण्डअनुसार लिग सञ्चालन गर” भन्ने जस्ता प्लेकार्डहरू प्रदर्शन गरेका थिए।

यसअघि नेपाल फुटबल खेलाडी संघ (एनएफपीए) ले पनि एन्फा कम्प्लेक्स अगाडि धर्ना दिँदै ए–डिभिजन लिग तत्काल सुरु गर्न माग गरेको थियो। एन्फासँगको विगतको सम्झौता लागू नभएको र घरेलु फुटबल अव्यवस्थित हुँदै गएको भन्दै संघले नियमित लिग प्रणालीको आवश्यकता दोहो¥याएको थियो।