देशभरका हजारौँ शिक्षक महिनौँदेखि रोकिएको तलब–भत्ताका कारण चिन्तित छन्। यही तनावको दलदल बिच नेपाल शिक्षक महासंघ आज शिक्षामन्त्री महावीर पुनको ढोका ढक्ढक्याउँदै पुगेको छ। उनीहरूको एउटै आग्रह—विगत सरकारसँग भएको ९ बुँदे सहमति तत्काल कार्यान्वयन गरियोस्।
मंगलबार मन्त्री पुनसँग भेटघाटपछि महासंघका अध्यक्ष लक्ष्मीकिशोर सुवेदीले शिक्षक सरुवा निर्देशिका खारेज, वैशाख १७ मा मन्त्रिपरिषद्ले गरेको नौबुँदे निर्णय लागू गर्नेजस्ता मागहरू राखिएको बताए। “मन्त्रीज्यूले ‘म सोधखोज गर्छु, बुझ्छु’ भनेर सकारात्मक संकेत दिनुभयो,” सुवेदीको भनाइ छ। देशका केही स्थानीय तहले राजनीतिक विवादका कारण परिषद् बैठक नै गर्न नसक्दा बजेट अड्किएको र त्यसको प्रत्यक्ष मार शिक्षकको तलबमा परेको महासंघको गुनासो छ। “आर्थिक नियमावली परिमार्जन गरेर भए पनि तलब तुरुन्तै खोलियोस्,” महासंघले जोड दिएको छ।
गत चैत–वैशाखमा काठमाडौँमा भएको दीर्घ आन्दोलनपछि तत्कालीन शिक्षामन्त्री रघुजी पन्तसँग ९ बुँदे सहमति भएको थियो। तर शिक्षा ऐनबाट सुरु हुने भनिएको सुधार प्रक्रिया अझै कागजमै सीमित छ।
