काठमाडौँ – भदौ २४ मा भएको जेनजी प्रदर्शनको क्रममा सशस्त्र प्रहरीको हतियार र सुरक्षा सामाग्री जोगाउन नसकेको भन्दै डीएसपी गौतम कुँवरसहित १७ जनालाई कारबाहीको सिफारिस गरिएको छ।आन्तरिक छानबिन समितिले प्रतिवेदनमा सुरक्षा कमजोरी औँल्याउँदै मिनभवनस्थित बेस र झापाको बेलडाँगीस्थित भुटानी शरणार्थी शिविरमा खटिएको सशस्त्र टोलीले आफ्नो जिम्मेवारीमा रहेका हतियार जोगाउन नसकेको जनाएको छ। प्रतिवेदनअनुसार, प्रदर्शनकारीले यातायात व्यवस्था कार्यालय र सशस्त्रको बेसमा तोडफोड र आगजनी गरेका थिए।
डीएसपी कुँवर तत्कालीन मिनभवन बेसको प्रमुख थिए र हाल नम्बर–२० विपद् उद्धार गण सिनामंगलमा कार्यरत छन्। समितिले मिनभवनमा कार्यरत १३ र बेलडाँगीमा कार्यरत ४ जनालाई विभागीय कारबाही गर्न सिफारिस गरेको छ।प्रतिवेदनमा भने अनुसार, मिनभवनबाट २० थान एसएलआर हतियार हराएको थियो। त्यसमध्ये ११ थान जलेको अवस्थामा फेला परेको थियो भने केही अन्य हतियार बिभिन्न स्थानबाट बरामद गरिएको छ। झापाको बेलडाँगीमा ४ थान एसएलआर आगजनीको अवस्थामा भेटिएका थिए।
सशस्त्र प्रहरी प्रधान कार्यालयले अहिलेसम्म हतियार लुटिएको यकिन तथ्याङ्क सार्वजनिक गरेको छैन। प्रदर्शनमा सशस्त्र प्रहरीका ५० भन्दा बढी सवारी साधनमा आगजनी गरिएको थियो। यसमा नयाँ बानेश्वरस्थित संसद भवन, सिंहदरबार, रानीपोखरी र भैंसेपाटीस्थित मन्त्री क्वार्टरका गाडीहरू पनि क्षति ग्रस्त भएका थिए।
एक उच्च सशस्त्र अधिकारीले भने, “प्रतिवेदनमा आन्दोलनमा सशस्त्रले खेलेको राम्रो र नराम्रो दुवै भूमिकाको विश्लेषण गरिएको छ।”
