अमलाचौर सम्पर्क समाजको प्रथम अधिवेशन सम्पन्न, नयाँ नेतृत्व चयन

भरतपुर,चैत२१- अमलाचौर (बाग्लुङ) बाट चितवन र नवलपुर क्षेत्रमा बसोबास गर्ने व्यक्तिहरूबीच आपसी सम्पर्क, सहकार्य र सहयोग अभिवृद्धि गर्ने उद्देश्यले स्थापित अमलाचौर चितवन–नवलपुर सम्पर्क समाज को प्रथम साधारण सभा तथा अधिवेशन भरतपुरस्थित होटल सुभम एन्ड हस्पिटालिटी, चौबिसकोठीमा सम्पन्न भएको छ।
संस्थाका अध्यक्ष लक्ष्मी कान्त आचार्यको सभापतित्वमा सम्पन्न कार्यक्रममा भरतपुर महानगरपालिका–१० का कार्यवाहक अध्यक्ष रेशमराज थापा (ऋषि) प्रमुख अतिथि रहनुभएको थियो। बाग्लुङ चितवन–नवलपुर सम्पर्क समाजका अध्यक्ष श्रीप्रकाश कंडेल विशिष्ट अतिथिका रूपमा सहभागी हुनुभएको थियो।
कार्यक्रमको उद्घाटन प्रमुख अतिथिबाट व्यानर वाचन गरी गरिएको थियो भने राष्ट्रिय गानबाट कार्यक्रमको सुरुवात गरिएको थियो। कार्यक्रममा ७० वर्षमाथिका ज्येष्ठ नागरिकहरूलाई सम्मान गरिएको थियो। स्वागत मन्तव्य गीता देवी शर्मा र तिलकुमारी ढकालले प्रस्तुत गर्नुभएको थियो।
कोषाध्यक्ष भगवती शर्माले आर्थिक प्रतिवेदन र सचिव प्रकाश शर्माले संस्थाको गतिविधि तथा भावी योजनासहितको प्रतिवेदन प्रस्तुत गर्नुभएको थियो। कार्यक्रममा विभिन्न सम्पर्क समाजका प्रतिनिधिहरूले शुभकामना मन्तव्य राखेका थिए।
साधारण सभाले सर्वसम्मत रूपमा १९ सदस्यीय नयाँ कार्यसमिति चयन गरेको छ। जसअनुसार अध्यक्षमा लक्ष्मी कान्त आचार्य, बरिष्ठ उपाध्यक्षमा हेमराज अधिकारी, महिला उपाध्यक्षमा तिलकुमारी ढकाल, उपाध्यक्षमा श्रीप्रसाद शर्मा, सचिवमा प्रकाश शर्मा, कोषाध्यक्षमा तोयनाथ पौडेल, सह-कोषाध्यक्षमा लीला कुमारी शर्मा पौडेल र सह-सचिवमा विश्व रोका चयन हुनुभएको छ। साथै ११ जना सदस्य चयन भएका छन्।
अधिवेशनले अमलाचौरवासीहरूबीच एकता सुदृढ गर्दै शिक्षा, स्वास्थ्य, संस्कृति तथा सामाजिक विकासमा सक्रिय भूमिका निर्वाह गर्ने प्रतिबद्धता व्यक्त गरेको छ। संस्थाले यसअघि तीज विशेष कार्यक्रम, चेली सम्मानलगायतका सामाजिक गतिविधि सञ्चालन गर्दै आएको जनाएको छ।
समाजले चितवन र नवलपुरमा बसोबास गर्ने अमलाचौरवासीलाई एकताबद्ध भई सामाजिक कार्यमा सक्रिय सहभागिता जनाउन आह्वान गरेको छ।