माइतीघरमा ९ दिनको आमरण अनशन तोडे यादव सिंह, सरकारले दियो माग सम्बोधनको आश्वासन

काठमाडौंको माइतीघर मण्डलमा ९ दिनसम्म आमरण अनशन बसेका यादव सिंहले बिहीबार साँझ अनशन तोडेका छन्। घाइते जेन–जी अभियन्ता मदन कार्की र विजेश तामाङले जुस खुवाएपछि उनले अनशन अन्त्य गरेका हुन्।गृह मन्त्रालयका उपसचिव रविन्द्र आचार्य र स्वकीय सचिव धिरज जोशी अनसन स्थल मै पुगेका थिए। उनीहरूले यादवका माग सम्बोधन गरिने लिखित प्रतिवद्धता दिएपछि अनशन तोडिएको यादवले जानकारी गराए। साथै सीडीओ ईश्वराज पौडेल, स्वास्थ्य मन्त्री सुधा गौतम, गृहमन्त्री ओमप्रकाश अर्याल र प्रधानमन्त्री सुशीला कार्कीले समेत माग पूरा हुने आश्वासन दिएको उनले बताए।

यादवले कात्तिक २५ गतेदेखि भदौ २३/२४ गते जेन–जी आन्दोलनका क्रममा प्रहरीको गोलीबाट मारिएका र घाइते भएका युवाहरूको माग उठाउँदै अनशन थालेका थिए। उनले पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकलाई पक्राउ गरी कारबाही गर्नुपर्ने, सहिद परिवार तथा घाइतेका माग तत्काल सम्बोधन गर्नुपर्ने, जेन–जी आन्दोलनलाई कुशासन–भ्रष्टाचारविरुद्धको जनआन्दोलन घोषणा गर्नुपर्ने र उच्चस्तरीय सम्पत्ति छानबिन आयोग गठन गर्नुपर्ने माग राखेका थिए।