राष्ट्रिय प्रजातन्त्र पार्टी (राप्रपा) को केन्द्रीय कार्यसम्पादन समिति बैठक आज बस्दै छ। प्रवक्ता मोहन श्रेष्ठका अनुसार बैठक दिउँसो १ बजे धुम्बाराहीस्थित केन्द्रीय कार्यालयमा बोलाइएको हो।
बैठकमा समसामयिक राजनीतिक परिस्थिति, आसन्न केन्द्रीय समिति बैठकका एजेन्डा तथा पार्टीभित्र आन्तरिक एकता कायम गर्ने विषय प्रमुख रूपमा उठ्ने जनाइएको छ। साथै सबै तहका अधिवेशनको प्रगतिसमेत समीक्षा गरिनेछ। राप्रपाले मंसिर मसान्तभित्र प्रदेश अधिवेशन सक्न निर्देशन दिएको थियो।
फागुन २१ मा हुने प्रतिनिधि सभा निर्वाचनका लागि दल दर्ता गरिसकेको राप्रपाले चुनावी तयारी, संगठन सुदृढिकरण र एजेन्डा–केन्द्रित कार्यक्रमलाई कसरी अघि बढाउने भन्नेबारे पनि आजको बैठकमा निर्णयात्मक छलफल हुने अपेक्षा गरिएको छ।
यसैबीच, महामन्त्री धवल शम्शेर राणा सहितका नेताहरूले नियमित महाधिवेशनको माग चर्को रूपमा उठाइरहेका छन्। २०७८ मंसिरमा भएको महाधिवेशनपछि विधानअनुसार चार वर्षे कार्यकाल मंसिर १८ मा सकिँदै भएकाले कार्यकाल थप गर्ने कि नयाँ महाधिवेशनमा जाने भन्ने विषयले बैठकलाई अझ संवेदनशील बनाएको छ।
