प्रगतिशील लोकतान्त्रिक पार्टीका नेता जनार्दन शर्मालाई गृहजिल्ला रूकुम पश्चिममा केही युवाहरूले कालो झण्डा देखाएर विरोध प्रदर्शन गरेका छन्।
आज बिहान १० बजेतिर सल्लेस्थित विमानस्थलमा अवतरण गरेलगत्तै नेपाली कम्युनिस्ट पार्टीनिकट युवाहरूको समूहले शर्माविरुद्ध नाराबाजी गर्दै कालो झण्डा प्रदर्शन गरेको हो। उक्त समूहको नेतृत्व तत्कालीन नेकपा माओवादी केन्द्रका आठबिसकोट नगरपालिका कमिटीका पूर्वअध्यक्ष मानबहादुर चदारा गरिरहेका थिए।
माओवादी परित्याग गरी प्रगतिशील लोकतान्त्रिक पार्टी (प्रलोपा) गठन गरेपछि शर्मा पहिलोपटक गृहजिल्ला पुगेका थिए। करिब २० जनाको समूहले नाराबाजी गर्दै शर्माले जनता र सहिदलाई धोका दिएको आरोप लगाउँदै विरोध जनाएका थिए।
विरोधका बीच पनि शर्माले स्थानीय कार्यकर्तासँग भेटघाट र निर्धारित कार्यक्रममा सहभागिता जनाएका छन्।
