बुटवलस्थित सुप्रिम सहकारी ठगी तथा संगठित अपराध मुद्दामा थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र गोर्खा मिडियाका तत्कालीन सञ्चालक छविलाल जोशीको मुद्दा लगातार स्थगित हुँदै आएको छ। एउटै मुद्दा भए पनि दुवै पक्षका कानुन व्यवसायीले अलग–अलग निवेदन दिँदा हालसम्म तीन पटक सुनुवाइ रोकिएको अदालतले जनाएको छ।
लामिछानेका कानुन व्यवसायीले दुई पटक, जोशीका कानुन व्यवसायीले एक पटक सुनुवाइ सार्न माग गरेका छन्। अधिवक्ता कीर्तिनाथ शर्मा पौडेलका अनुसार ५–७ पटकसम्म निरन्तर स्थगन भए प्रश्न उठ्न सक्ने भए पनि अहिलेकै अवस्थालाई अस्वाभाविक भन्न नमिल्ने बताउँछन्।
उच्च अदालत तुलसीपुर, बुटवल इजलासमा कात्तिक १३ गते पहिलो सुनुवाइ तोकिए पनि स्थगित भयो। त्यसपछि कात्तिक २० र २७ का इजलासले सर्वोच्च अदालतमा रहेको मूल मिसिल मगाउने आदेश दिए। सुरु मिसिल नआए पनि जिल्ला अदालतको प्रतिलिपि मात्र प्राप्त भएको छ।
मंसिर ४ र ११ गतेका पेसी पनि लामिछाने पक्षले पाटन उच्च अदालतमा अर्को पेसी परेको कारण देखाउँदै स्थगित गराएका थिए। बिगो बुझाएको कागजात पेश गरेका दुवै अभियुक्त अहिले पुर्पक्षका लागि कारागारमै छन्। सुप्रिम सहकारी ठगी प्रकरणमा १० करोड ९९ लाख ३६ हजार रुपैयाँ बिगो निर्क्योल गरिएको छ।
