पूर्वराष्ट्रपति विद्यादेवी भण्डारीले भदौ २३ गते संसद भवन अगाडि भएको जेनजी आन्दोलनको गोलीकाण्डको पूर्ण जिम्मेवारी तत्कालीन सरकारले लिनुपर्ने स्पष्ट गरेकी छन्। कान्तिपुर टेलिभिजनको ‘फायर साइड’ कार्यक्रमसँगको अन्तर्वार्तामा उनले त्यतिबेलाका प्रधानमन्त्री केपी शर्मा ओली नेतृत्वको सरकारले नैतिक जिम्मेवारीबाट उम्कन नपाउने बताइन्। भण्डारीका अनुसार प्राकृतिक प्रकोपदेखि सुरक्षा चुनौतीसम्म—कुनै पनि गम्भीर घटना हुँदा सरकार जिम्मेवार ठहरिने सामान्य प्रचलन हो। त्यसैले जेनजी आन्दोलनमा २२ जना युवाको ज्यान गएको घटनामा पनि तत्कालीन सरकारको नैतिक र राजनीतिक दायित्व छुट्दैन।
उनले भनिन्, “विद्यार्थीहरू जुलुसमा आउँदा सुरक्षा व्यवस्था कमजोर देखियो। एकै दिन २२ जनाको मृत्यु हुनु नेपालको इतिहासकै दर्दनाक घटना हो। त्यसको अपजस सरकारले नै बेहोर्नुपर्छ।”
सुरक्षा कमजोरी, अग्रिम सूचना नदिनु, भीड व्यवस्थापनमा त्रुटि—यी सबै विषयमा गम्भीर अनुसन्धान आवश्यक भएको भण्डारीको भनाइ छ। “नैतिक जिम्मेवारी त लिए पनि, नलिए पनि, संसारले त्यो सरकारकै जिम्मा भन्छ। त्यसैले जिम्मेवारी स्वीकार्नैपर्छ,” उनले जोड दिइन्। भदौ २३ मा संसद क्षेत्र नजिक प्रदर्शनकारीमाथि गोली लागेर १९ जनाको मृत्यु भएको थियो। त्यसपछिका दिनमा उपचारका क्रममा थप ४ जनाको मृत्यु भई कूल २३ जनाको ज्यान गएको थियो। भदौ २४ सम्म मृत्यु संख्या ७६ पुगेको आधिकारिक विवरण छ।
भण्डारीले घटनाको सत्यतथ्य सार्वजनिक गर्दै राजनीतिक नेतृत्व र सुरक्षा संयन्त्र दुवैले आत्मसमीक्षा गर्नुपर्ने आवश्यकता दोहोर्याइन्।
