नेपाली कांग्रेसका नेता चन्द्र भण्डारीले पार्टीको १५औँ महाधिवेशनमा सभापति पदका लागि उम्मेदवारी दिने घोषणा गरेका छन्। उनले सामाजिक सञ्जाल फेसबुकमार्फत् आफ्नो आकांक्षा सार्वजनिक गर्दै नेतृत्वमा आउने तयारीबारे स्पष्ट संकेत दिएका हुन्।
भण्डारीले देश, जनता र लोकतन्त्रको हितलाई प्राथमिकता दिने उल्लेख गर्दै राजनीतिक परिस्थितिको माग अनुसार शून्यदेखि सयसम्म जति आवश्यक परे पनि अघि बढ्न तयार रहेको बताएका छन्। साथै, साथीहरूको सुझाव, समयको आवश्यकता र राजनीतिक वातावरणलाई ध्यानमा राखेर निर्णय लिने बताए।
कांग्रेसको १५औँ महाधिवेशन पुस २७ देखि २९ गते काठमाडौंमा हुँदैछ। महाधिवेशन नजिकिँदै जाँदा सभापति पदमा दाबी गर्ने नेताहरू सक्रिय बनेका छन्, र भण्डारीको घोषणाले आगामी नेतृत्व प्रतिस्पर्धा थप चासोको विषय बनेको छ।
