२०३६ साल असोज २० गते स्यांजाको वालिंगमा जन्मनु भएका चिरन तिवारी जापानको राम्रो कमाई छोडेर नेपालमा म:मको डल्ला बनाउनु हुन्छ भनेर सुन्दा धेरैलाई पत्यार नलाग्न सक्छ । तिवारीले १६ वर्ष जापानको बसाई पछि नेपालमै केहि गर्छु भनेर २०७६ जेस्ठबाट तिवारी सन्स ग्रुप नामक उद्योग दर्ता गरेर दैनिक १५०० प्लेट म:म बेच्दै आउनु भएको छ ।
नेपालमा बिरलै मेसिनले बनाएको म:म देख्ने गरिन्छ, कतिलाई म:म मेसिनमै बन्छ भनेको सुन्दा पनि अचम्म लाग्न सक्छ । जापानमा सिकेको सिपको ज्ञानलाई नेपालमा उद्धमसिलातामा परिणत गर्दा मक्ख हुनुहुन्छ चिरन तिवारी। जापान बसाईबाट कमाएको रकमले जे गर्छु नेपाल मै गर्छु भन्ने सोच पहिले देखिने रहेको तिवारी बताउनु हुन्छ ।
५० लाखमा सुरु गरेको मेसिनले उद्योग अहिले १ करोडको लगानीमा संचालन भई रहेको छ। मेसिनले म:म बनाएर अन्य पसललाई मात्र होइन अहिले आफ्नै रेस्टुरेन्टबाट पनि बिक्रि गर्दै आउनु भएको छ । हाल प्रति दिन १५०० प्लेट फ्रोज़न म:मको कारोबार हुने तिवारी बताउनु हुन्छ । भेज, चिकेन र बफ गरेर तिन प्रकारका म:म बन्छन ।
म:म बनाउने काम सुरु हुन्छ चिकेनलाई किमा बनाएर । किमा पनि मेसिनबाटै बनाइन्छ , अर्को मेसिनमा मैदा मुछिन्छ । किमालाई मसला, लसुन, प्याज मिक्चरबाट म:म मसला तयार गरिन्छ । म:म मसला तयार गरे पछि मुछेको मैदासंग म:म मेसिनमा राखिन्छ । त्यो मेसिन मा स्पिड अनुसार म:म तयार हुन्छ । एकतिरबाट मसला अर्कोतिर बाट मैदा त्यसलाई डाईले च्यापेर म:मको आकार दिन्छ। त्यसरी बनाएको म:म हातले बनाएको जस्तै देखिन्छ तर आकार र तौलमा एक रुपता हुन्छ । चिकन म:म प्रति पिस २२देखि २५को ग्राम हुने गर्दछ । म:मको डल्लालाई अब १ किलो , ५ किलो , १० किलोको अलग अलग प्याकिंग गरेर फ्रिजिंग गरिन्छ । फ्रिजिंग गर्दा चिसोबाट हानिकारक ब्याक्टेरिया नस्ट हुन्छन । १२ घण्टा फ्रिजिंग गरे पछि माग अनुसार बजारमा पठाइन्छ । भेज म:मको ४५ र चिकन म:म को ७० मूल्य राखिएको छ । तयार पारिएको फ्रोजन म:म चितवनको विभिन्न होटेल देखि गोरखा, रामनगर, हेटौडा देखि सुनवल सम्म जाने गरेको छ ।होटेलहरुले आफै म:म बनाउने झन्झट हटेको कारण फ्रोजन म:मको माग बढ्दो रहेको तिवारीको भनाई रहेको छ ।
१७ जनालाई प्रत्यक्ष रोजगार दिनु भएको तिवारी सामाजिक कार्यमा पनि त्यतिकै सक्रिय हुनुहुन्छ । अनुसासित र इमान्दार भएर काम गर्न युवाहरुलाई तिवारीको सल्लाह रहेको छ ।
