नेपालमा कोरोना भाइरस (कोभिड–१९) संक्रमणको ग्राफ बढ्दो छ। बिहीबार अहिलेसम्मकै सबैभन्दा बढी ६७१ जनामा कोरोना संक्रमण पुष्टि भएको छ। सरकारले चैत ११ गतेदेखि कोरोना संक्रमण नियन्त्रणका लागि गरेको लकडाउन असार १ गतेबाट खुकुलो पारेसँगै संक्रमितको संख्या बढ्दै गएको देखिन्छ।
पछिल्लो हप्ताको मात्र संक्रमण दर हेर्दा मंगलबार केही संख्या घटे पनि अरु दिन बढेको देखिन्छ। आइतबार ४२५, सोमबार ४५१, मंगलबार ३८०, बुधबार ५८६ जनामा संक्रमण पुष्टि हुँदा बिहीबार अहिलेसम्मकै सबैभन्दा बढी ६७१ जनामा कोरोना पोजिटिभ देखिएको हो।
स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमका अनुसार बिहीबार ६७१ जनाको पीसीआर रिपोर्ट पोजिटिभ आएसँगै संक्रमितको संख्या सात हजार ८ सय ४८ पुगेको छ।
अहिलेसम्म पीसीआर विधिबाट एक लाख ५५ हजार ५ सय १८ र आरडीटी विधिबाट दुई लाख ४३ हजार ७५ जनाको नमुना परीक्षण गरिएको छ।
नेपालमा कोरोनाकै कारण मृत्यु हुनेको संख्या २२ पुग्दा कोरोना जित्नेको संख्या भने ११ सय ८६ पुगेको छ। पछिल्लो २४ घण्टामा १९ जना डिस्चार्ज भएका छन्। अहिले क्वारेन्टाइनमा एक लाख १६ हजार २ सय १५ जनालाई राखिएको छ। मन्त्रालयका अनुसार ६ हजार ६ सय ४८ जनाको आइसोलेसनमा उपचार भइराखेको छ।
