राप्ती,भदौ ३१- चितवनको राप्ती नगरपालिका–१, सिमरामा एक विपन्न परिवारलाई नयाँ घर हस्तान्तरण गरिएको छ।
राप्ती–१ निवासी दिपकप्रसाद थपलिया शर्माले आफ्नो ६५औँ जन्मदिनको अवसरमा निर्माण गरिएको घर विपन्न परिवारलाई हस्तान्तरण गर्नुभएको हो।
अन्दाजी ७० वर्षीया एकल महिला मनमाया प्रजाको आठ सदस्यीय परिवारलाई घर हस्तान्तरण गरिएको हो। थपलिया दम्पती र राप्ती–१ का वडाध्यक्ष सिद्धीलाल स्याङ्तानले संयुक्त रूपमा प्रजा परिवारलाई घर हस्तान्तरण गर्नुभएको थियो।
करिब दुई लाख ५० हजार रुपैयाँको लागतमा निर्माण गरिएको दुई कोठे घर छ महिनामा सम्पन्न भएको हो। हस्तान्तरण कार्यक्रममा थपलियाले उक्त घर भूकम्पप्रतिरोधी रहेको जानकारी दिनुभयो।
घर हस्तान्तरणसँगै प्रजा परिवारलाई खाट, सिरक, डसना, सिरानी तथा लत्ताकपडालगायतका सामग्री समेत प्रदान गरिएको थियो।
कार्यक्रममा राप्ती–१ का वडाध्यक्ष सिद्धीलाल स्याङ्तान, वडा सदस्य ग्रेस तामाङ, वडा सदस्य राजु राई, सामाजिक व्यक्तित्व मानबहादुर स्याङ्वो, कुमार थापा, जयहरी जनचेतना सामुदायिक वन राप्ती–१ का अध्यक्ष पूर्णबहादुर राई, टोल सुधार समितिका अध्यक्षलगायतको उपस्थिति थियो।
विगत लामो समय देखी खडाई र् माटोबाट निर्मित छानो चुहिने घरमा कष्टकर तरिकाले बस्दै आएका प्रजा परिवारलाई थपालियाले घर उपहार दिए पछी दंग र उत्साहित छन।
यसैबीच, थपलियाले प्रजा परिवारको घरसँगै रहेको अर्को चार कोठे घर निर्माणका लागि समेत आंशिक सहयोग गर्नुभएको छ।
