घरबेटीले डेरा छाड्न दबाब दिएमा प्रहरीमा उजुुरी गर्नु

काठमाडौँ- स्वास्थ्यकर्मीहरुलाई घरबेटीले डेरा छोड्न दबाब दिइरहेको गुनासो आइरहेका बेला सरकारले त्यस्ता घरबेटीलाई कारबाहीको चेतावनी दिएको छ । कुनै घरबेटीले डेरा छाड्न दबाब दिएको भए नजिकैको प्रहरी चौकीमा उजुुरी गर्न स्वास्थ्य मन्त्रालयले सम्पूर्ण स्वास्थ्यकर्मीलाई आग्रह गरेको छ ।

मंगलबार आयोजित पत्रकार सम्मेलनमा स्वास्थ्य मन्त्रालयका विज्ञ सल्लाहकार डा. खेम कार्कीले भने, ‘यदि कोही घरबेटीले कोभिड १९ को त्रासका नाममा डेरा छाड्न दबाब दिइरहेको भए, उजुरी दिनुहोस् ।’ डा. कार्कीले अहिले कुनै पनि स्वास्थ्यकर्मीबाट कोभिड १९ को संक्रमण फैलने कुनै खतरा नरहेको प्रष्ट पार्दै भने, ‘यदि संक्रमणले बढ्दो रुप लिए हामीले सुविधा सम्पन्न होटलमा स्वास्थ्यकर्मीलाई राख्ने व्यवस्था मिलाएका छौँ, अहिले खतराको अवस्था छैन ।’

उनले देशभरका विभिन्न ठाउँबाट घरबेटीले डेरा छाड्न दबाब दिएको गुनासो आइरहकोले त्यस्तो सामाजिक अपराध नगर्न घरधनीलाई आग्रह गरे ।