भरतपुर/औद्योगिक फिडरसँग सम्बन्धित उद्योगीहरु र नेपाल विद्युत प्राधिकरण भरतपुरका प्रतिनिधिबीच समसामयिक विषयमा छलफल सम्पन्न भएको छ । औद्योगिक फिडर अन्तर्गत १ र २ स्टेशनहरुको लाइन मर्मत र ट्रान्सफर्मर परिवर्तन गर्न भाद्र ६ गतेदेखि ९ गतेसम्म विद्युत आपूर्ति बन्द गर्नुपर्ने विद्युत प्राधिकरणको प्रस्ताव माथि छलफल गरिएको होे ।
छलफलमा उक्त क्षेत्रमा सञ्चालित उद्योगीहरुको समस्यालाई ध्यानमा राखी दुईचरण गरी ४–४ घण्टाको समयमा विद्युत आपूर्ति गर्नुपर्ने र फिडर १ र २ मा अल्टरनेटिभ रुपमा विद्युत आपूर्ति गर्नुपर्ने समय अनुकुलता र सम्भव भएसम्म दशैं र तिहारको बिचको समयमा विद्युत मर्मत कार्य गर्दा उपयुक्त हुने उद्योगीहरुबाट सुझाव आएको थियो । उक्त सुझावहरुको आधारमा कम क्षतीमा विद्युत मर्मत गर्ने कार्यतालिका ल्याउन विद्युत प्राधिकरणलाई सुझाव समेत दिइएको थियो ।
चितवन उद्योग संघका बरिष्ठ उपाध्यक्ष राजु पौडेलको अध्यक्षतामा सम्पन्न छलफल कार्यक्रममा औद्योगिक फिडर उपभोक्ता समितिका संयोजक अरुण पिया, नेपाल विद्युत प्राधिकरणका इन्जिनियर शिशिर लम्साल, चितवन उद्योग संघका कार्यसमिति सदस्य जितबहादुर हमाल, औद्योगिक फिडरका उपभोक्ता समितिका पदाधिकारी एवं सदस्यहरुको सहभागिता रहेको थियो ।