बाढीपीडितको सहयोगमा बेलायतस्थित नेपाली रेस्टुरेन्टको पहल, प्रधानमन्त्री दैवी प्रकोप उद्धार कोषमा ५ लाखभन्दा बढी रकम सहयोग

बेलायत,असोज १०- नेपालमा गत भदौ १० गते आएको विनाशकारी बाढीबाट प्रभावित तथा पीडित नागरिकका लागि बेलायतमा आयोजित च्यारिटी डिनरबाट पाँच लाख रुपैयाँभन्दा बढी सहयोग रकम संकलन भएको छ।
बेलायतको कर्नवाल जिल्लास्थित सेन्ट अस्टलमा रहेको नेपालीज गोर्खा रेस्टुरेन्टले नेपालमा बाढीबाट प्रभावित नागरिकलाई खाद्यान्न, लत्ताकपडा, औषधिलगायत दैनिक आवश्यक सामग्री उपलब्ध गराउने उद्देश्यले सेप्टेम्बर २२ र २३ गते दुईदिने च्यारिटी डिनर आयोजना गरेको थियो।
उक्त अभियानबाट £२,५७५.७३ पाउण्ड स्टर्लिङ, अर्थात् नेपाली रुपैयाँ पाँच लाखभन्दा बढी रकम संकलन भएको रेस्टुरेन्ट सञ्चालक राज सेढाइँले जानकारी दिए। उनका अनुसार संकलित रकम नेपाल सरकारको प्रधानमन्त्री दैवी प्रकोप उद्धार कोषको आधिकारिक खातामा जम्मा गरिएको छ।
च्यारिटी डिनरमा बेलायतका सांसद नोवा ल (Noah Law), मेयर एथन स्टेफेन्स (Ethan Stephens) सहित दुई सयभन्दा बढीको सहभागिता रहेको थियो। कार्यक्रममा सहभागी अधिकांश बेलायती तथा विभिन्न देशका नागरिकले नेपाल बाढीको विपत्तिमा परेका बेला आफूहरूले सकेको सहयोग गर्न पाउँदा खुसी लागेको बताएका थिए।
सहभागीहरूले बाढी तथा विपद्मा परी ज्यान गुमाएका नागरिकप्रति गहिरो समवेदना व्यक्त गर्दै प्रभावित तथा विपद्बाट जोगिएका नागरिकको शीघ्र पुनःस्थापना र स्वास्थ्यलाभको कामना गरेका थिए।
नेपालमा आएको विपत्तिको समयमा विदेशी भूमिबाट आफ्नो जन्मभूमिका नागरिकका लागि सहयोग जुटाउन पाउँदा आफूलाई गर्व लागेको रेस्टुरेन्ट सञ्चालक सेढाइँले बताए।
“देशमा लागेको चोटमा थोरै भए पनि मलम लगाउने उद्देश्यले यो अभियान सञ्चालन गरेका हौँ। अभियान सफल बनाउन सहयोग गर्नुहुने मेरा परिवारका सदस्य, रेस्टुरेन्टमा कार्यरत सम्पूर्ण कर्मचारी तथा प्रत्यक्ष–अप्रत्यक्ष रूपमा हौसला र सहयोग गर्नुहुने सबैप्रति हार्दिक धन्यवाद तथा आभार व्यक्त गर्दछु,” सेढाइँले भने।
विदेशमा रहेर पनि मातृभूमिमा परेको विपत्तिमा सहयोग जुटाउने नेपाली समुदायको यो पहलले मानवीय संवेदना र सामाजिक उत्तरदायित्वको उदाहरण प्रस्तुत गरेको छ।