स्थानीय माग पूरा गर्ने उद्धेश्यले बेटर चितवनका अभियन्ता युवाहरुको समूह माली दाईले तेस्रो वर्ष पनि सयपत्री फूल खेति गरेको हो । वर्षभरि नै सयपत्री फूलको उत्पादन गर्दै आइरहेको माली दाईले युवा उद्यमशीलता प्रोत्साहान गर्न विभिन्न जातका फूलखेती गर्दै आइरहेको छ ।
विवाह, व्रतबन्ध, पूजा, सेमिनार, डेकोरेशन लगायत विभिन्न प्रयोजनका लागि प्रयोग हुने सयपत्री फूलको तिहारको समयमा अध्यधिक माग हुने गरेको छ । अधिकांश समय भारत लगायत अन्य ठाउँबाट आयात हुने सयपत्री फूलहरूको स्थानीय स्तरमा नै उत्पादन गर्दा यसले स्वस्थ अर्गानिक फूल उपभोक्तासम्म पुर्याउन सहज हुने साथै स्थानीय युवाहरुमा उद्यमशीलताको कल्चरको समेत विकास हुने माली दाईका संस्थापक सदस्य सुजता देवकोटाले जानकारी दिनु भयो ।
चितवनमा मात्रै माली दाई मार्फत विभिन्न क्षेत्रमा युवाहरुले करिब ३० हजार फूलका बिरुवाहरू लगएका र स्थानीय स्तरमा नै धेरै किसानहरूले फूलखेती सुरु गरेकाले यो वर्ष चितवनको फूलको माग पूरा गर्न भारतका फूलहरूको आवश्यकता नपर्ने सञ्चालक अजय डी सिले जानकारी दिनु भयो । चितवनमा मात्रै नभएर यो वर्ष आफूहरु मार्फत कावासोती, कपिलवस्तु, जनकपुर लगायतका ठाउँमा पनि युवाहरुले फूलखेती सुरु गरेको उहाँले बताउनु भयो ।
बेटर चितवन, चितवनका जुझारु युवाहरुको समूह हो, यसका संस्थापक सागर कार्की हुन् ।
