राष्ट्रियरुपमा चर्चा पाएको गौतमबुद्ध अन्तर्राष्ट्रिय क्रिकेट रङ्गशाला निर्माण कार्य अहिले धमाधम भईरहेको छ । रामपुरमा निर्माण थालिएको रङ्गशालामा जुटेका धुर्मुस सुन्तली फाउण्डेसनलाई देश विदेशबाट सहयोग आइरहेको छ । निर्माण हुँदै गरेको रङ्गशालाको अवलोकन र तस्वीर खिच्नेको भीड लागेको छ । अहिले रङ्गशालाको निर्माणको काम तीव्रगतिमा अघि बढेको छ । भुइँमा माटो भर्ने काम सम्पन्न गरी रोलरले पेल्ने कामसमेत भइसकेको छ । यसै बिच साझा पार्टीका संयोजक रबिन्द्र मिश्र सहितको टोलिले अबलोकन गरेको छ। रङ्गशाला अबलोकन गरे पछि मिश्रले आफ्नो फेस बुकमा ‘असोचनीय स्तरको काम’ भनेर सिताराम कट्टेल धुर्मुसको प्रसंसा समेत गरेका छन् ।
मिश्रको स्ट्याटस: ”धेरैपछि धुर्मुसलाई भेट्दा।”
”पहिले विपन्नहरूलाई वस्ती निर्माण गरेर धुर्मुस-सुन्तलीले ‘सोचनीय’ स्तरको उदाहरणीय काम गरे। अहिले उनीहरू व्यक्तिको अग्रसरतामा विरलै हुनसक्ने ‘असोचनीय’ स्तरको काम गरिरहेका छन्: अन्तराष्ट्रिय क्रिकेट रङ्गशाला बनाउने।
आज विहान साझा पार्टीका साथीहरूसँग रङ्गशाला निर्माण स्थल पुग्दा उनको उत्साह, दृढता र अनुहारको चमकमा रत्ति पनि कमी थिएन। असोचनीय स्तरको प्रतिकूलताका वावजुद उनी पूर्ण आत्मविश्वासका साथ मैदानमा व्यस्त थिए।
“रङगशालाको डिजाइनमा रहेको सातवटा पत्रले सातवटा प्रान्त र ७७ वटा कोठाले ७७ जिल्लालई प्रतिनिधित्व गर्छ। त्यसो गरेपछि सिँगो देशको अपनत्व हुन्छ। त्यही कारणले गर्दा अहिले देशभरीका र विदेशमा बस्ने नेपालीहरूबाट सहयोग प्राप्त भइरहेको छ,” उनले व्याख्या गर्दै गए।
बाटोमा फर्किँदा साथीहरूले भने: “हामीले पनि यो काममा कुनै न कुनै रूपमा सघाउनु पर्छ।” मैले भनेँ, “हामीले मात्र होइन, अब यो काममा सरकारले पनि सघाउनु पर्छ किनभने सरकारले यति ठूलो कामका लागि जग्गा र केही करोड रूपैयाँमात्र दिएर पुग्दै पुग्दैन।
सरकार जिम्मेवार र दूरदृष्टियुक्त भइदिएको भए राज्यले गर्नु पर्ने यस्ता काममा व्यक्ति अग्रसर हुनै पर्दैन थियो। त्यसो नभएकोले यहाँ व्यक्ति अग्रसर हुनु पर्यो। तर सरकारले पनि यसको महत्व आत्मसात गरिसकेकोले उसको सहयोग पनि अब अनिवार्य हुनेछ।
सबैको सहयोग रहोस् र धुर्मुस-सुन्तलीको सपना सारा नेपालीको विपनामा परिणत होस्! ”
