गुलरिया : कोभिड महामारीका बेला समुदायमा रोगले मात्र होइन भोकले पनि कोही नमरुन् भन्ने अभियान लिएर बर्दियामा खाद्य बैंक सुरु भएको छ। हुनेले दिऊन् नहुनेले लैजाऊन् भन्ने हेतुले खाद्य बैंक स्थापना गरिएको हो।
खाद्य बैंकमार्फत संकलित खाद्यान्न अभाव झेलिरहेका विपन्नलाई वितरण गरिएको हो। बर्दियामा अक्सिजन बैंकको सामाजिक अभियानले गति लिएसँगै रोगले मात्र होइन भोकले पनि कोही नमरून भन्ने अभिप्रायले खाद्य बैंक स्थापना गरिएको लायन्स क्लब अफ बर्दियाका अध्यक्ष सुधाकर मिश्रले बताए।
गुलरिया नगरपालिकाको समन्वय, सहयोग र सहकार्यमा हिन्दु स्वयंसेवक संघ नेपाल, लायन्स क्लब अफ बर्दिया र एन्टा अमेरिकालगायतका सामाजिक संस्थहरूले बैंकमार्फत खाद्यान्न संकलन गर्ने अभियान चलाइएको हो।
बैंकमा खाद्यान्नका लागि सहयोग उपलब्ध गराउने क्रम जारी छ। स्थानीय दाताहरूबाट सहयोग एकीकृत गरी विपन्न समुदायलाई खाद्यान्न वितरण गरिएको छ। ‘दाल, चामल, पिठो, नुन, तेललगायतका अत्यावश्यक सामग्री खाद्यान्न अभाव खेपिरहेका वास्तविक परिवारलाई उपलब्ध गराएका छौं, उनले भने,– ‘नगरमा लकडाउनले प्रभावित भई खाद्यान्न अभाव खेपिरहेका पीडितहरूलाई बैंकमार्फत संकलित सहयोग वितरण गर्ने हाम्रो मूल उद्देश्य हो।’
