सवारी चालक अनुमतिपत्र (लाइसेन्स) को आवेदन फारम र परीक्षा अन्यौलमा परेको छ । निषेधाज्ञा अझै नसकिएकोले लाइसेन्सको परीक्षा अन्यौलमा परेको यातायात व्यवस्था विभागका सूचना अधिकारी डा. लोकनाथ भुसालले जानकारी दिए ।
स्कुल कलेज खुलेसँगै लाइसेन्सको परीक्षा सञ्चालन हुने उनले बताए । ‘सीसीएमसीले लाइसेन्सको परीक्षालाई पनि स्कुल/कलेजको क्याटेगोरीमा राखेको हुनाले लाइसेन्सको परीक्षा रोकिएको हो । पोहोर पनि स्कुल/कलेज खुलेपछि मात्रै परीक्षा सञ्चालन भएको थियो,’ उनले भने ।
नयाँ लाइसेन्सको परीक्षा नभए पनि पुरानो लाइसेन्स रिन्यू भने भइरहेको भुसालले जानकारी दिए । १६ वैशाखपछिका लिखित र ट्रायलको डेट पाएकाहरूको हकमा पनि निषेधाज्ञा खुलेपछि मात्रै परीक्षा सञ्चालन हुने उनले जानकारी दिए ।
अब परीक्षा दिएर लाइसेन्स लिनेहरूले तुरुन्त परीक्षणकालीन लाइसेन्स पाउने छन् । चालकले परीक्षणकालीन लाइसेन्स पाएको १ वर्षसम्म ५ वटाभन्दा धेरै गल्ती नगरेमा स्थायी लाइसेन्स पाउने छन् । ५ पटकभन्दा धेरै गम्भीर गल्ती गरेमा पुनः लिखित, ट्रायल पास गरी परीक्षणकालीन लाइसेन्स नै लिनुपर्ने हुन्छ ।
(भि ग्रुप| मीडिया नेटवर्क )
