गोरखा । गोरखा नगरपालिकाले बालबालिकाहरुको क्षमता बिकासका लागि बाल संसदको अभ्यास गराएको छ ।शनिबार गोरखा नगरपालिका सामाजिक बिकास शाखाको आयोजनामा प्रधानमन्त्री, सभामुख, मन्त्रिहरु, प्रमुख प्रतिपक्ष दलको नेता चयन गरि बालबालिकहरुलाई संसदको अभ्यासa गराइएको हो ।
शाखाका प्रमुख बिजयभक्त उपाध्यायका अनुसार २५ जना बालबालिकाहरुको सहभागिता रहेको बाल संसद अभ्यासमा गोरखा नगर बालसञ्जालकी १६ बर्षिय प्रकृति दुवाडीले सभामुखको भूमिका निर्वाह गरेकी थिइन भने १४ बर्षिय अप्रिसा श्रेष्ठले संसदमा प्रधानमन्त्रीको भूमिका निर्वाह गरिन ।
त्यस्तै बालसञ्जालकी श्रेया श्रेष्ठले मन्त्रि, प्रिन्सा श्रेष्ठले संसद सचिवालयको महासचिव, बालिका दुर्गा श्रेष्ठले बिपक्षी दलको नेताको भूमिका निर्वाह गरेकी थिइन ।
बालसंसदको बैठकमा सांसदको भूमिका रहेका बालबालिकाहरुले बैठकमा नगरपालिका क्षेत्र भित्र कच्चीबाटो खनेर किन कालो पत्रे नगरेको ? भनेर सरकार संग प्रश्न उठाएको शाखा प्रमुख उपाध्यायले जानकारी दिए ।
बालसंसद अभ्यासमा सांसदहरुले उठाएको प्रश्नमा मन्त्रिको भूमिकामा रहेका बालबालिकाहरुले जवाफ दिएका थिए ।संसदिय व्यवस्थाका बारेमा बालबालिकाहरुलाई पनि जानकारी गराउनका लागि बाल संसद अभ्यास गराइएको शाखाले जनाएको छ । १ घण्टा १५ मिनेटसम्म चलेको बाल संसदमा सांसदहरुले उठाएका बिषय बस्तुमा १४ बर्षिया प्रधानमन्त्री अप्रिसा श्रेष्ठले जवाफ दिएकी थिइन ।
