चितवन। माडी नगरपालिका वडा नं ९ मा पर्ने कुसुमखोलाको सुकुमवासी बस्तीमा गरिएको आगजनीप्रति नेकपा (एमाले) चितवनले गम्भीर ध्यानाकर्षण जनाउँदै आगजनी पीडित सुकुम्बासीलाई क्षतिपूर्ति दिन माग गरेको छ।
नेकपा एमाले चितवनका अध्यक्ष रामप्रसाद न्यौपानेले प्रेस विज्ञप्ति जारी गर्दै कुसुम्खोलाका भूमिहीन सुकुमबासीहरुलाई उचित जमिनको पहिचान गरी व्यवस्थापन गर्न माग गरेका छन्। उनले सुकुम्बासीको व्यवस्थापन नभएसम्मको सो क्षेत्रबाट नउठाउन र आगजनीबाट नष्ट भएका दारपात, अन्नपात तथा लत्ताकपडाको उचित क्षतिपूर्तिको तत्काल व्यवस्था गर्न माग गरेका छन्।
‘जनमतको विरुद्ध सर्वोच्च अदालतको परमादेशको आधारमा बनेको दक्षिणपन्थी यथार्थवादी सरकारको ठाडो निर्देशनमा सो क्षेत्रमा वर्षौंदेखि बसोवास गर्दै आएका भूमिहीन सुकुमवासीहरुको घरमा घरका मूल मान्छे नभएको मौकामा आगजनी गरी धरभित्र भएका अन्नपात तथा लत्ताकपडासमेत फिक्न नपाई नष्ट गरेको घटना अत्यन्त निन्दनीय र भत्सर्नायोग्य छ’ विज्ञप्तिमा भनिएको छ, ‘संविधानले प्रदत्त गरेको नेपाली नागरिकले पाउने आधारभूत आवश्यकता गास , बास र कपासको व्यवस्थालाई कुल्चिंदै निकुन्जको एरिया भनिएको स्थान खाली गराउने निहुँमा भूमिहीन सुकुमबासीहरुलाई उचित स्थानको पहिचान गरी व्यवस्थापन गर्नुपर्ने ठाउँमा एक्कासि गरिएको अमानवीय कार्यको नेकपा एमाले चितवन घोर विरोध गर्दछ ।’
माडी नगरपालिका वडा नं ९ मा पर्ने कुसुमखोलाको सुकुमवासी बस्तीका १७ घरमा चितवन राष्ट्रिय निकुञ्ज प्रशासनले चैत १३ गते आगो लगाई नष्ट गरेको नेकपा (एमाले) चितवनले जनाएको छ ।
