भरतपुर, ३० कात्तिक । सरकारका राज्यमन्त्री एवं नेपाली काँग्रेसका केन्द्रीय सदस्य उमेश श्रेष्ठको निजी गाडी बुधबार बिहान भरतपुरमा तोडफोड भएको छ । बा ३ च २०५० नम्बरको ल्याण्डक्रुजर गाडी तीन वटा मोटरसाइकलमा आएको ६ जनाको अज्ञात समूहले तोडफोड गरेको प्रहरीले जनाएको छ ।
चितवन क्षेत्र नम्बर २ बाट प्रतिनिधिसभा सदस्यमा सत्ता गठबन्धनका साझा उम्मेदवार श्रेष्ठ चढ्ने गाडी भरतपुर–१० स्थित पुरानो मेडिकल कलेज नजिकै सडकमा पार्किङ गरिएको अवस्थामा अज्ञात समूहले तोडफोड गरेको हो । स्थानीय आमा समूहले आयोजना गरेको कार्यक्रममा राज्यमन्त्री श्रेष्ठ सहभागी भइरहेका बेला कार्यक्रमस्थल बाहिर अज्ञात समूहले आक्रमण गरी गाडीको अगाडिको सिसामा क्षति पुगेको छ ।
कार्यक्रमस्थलमा श्रेष्ठसँगै रहेका नेपाल विद्यार्थी संघ चितवनका सभापति सूर्य ढकालले घटनाको निन्दा गर्दै भने, “उमेश श्रेष्ठको पक्षमा दिन प्रतिदिन बढ्दो जनलहर देखेर हारको मानसिकताले घटना घटाएका छन् । लोकतन्त्रमा यस्ता घटना क्षम्य हुदैनन् । २ नम्बर क्षेत्रका जनताले यसको हिसाबकिताब गर्नेछन् ।”
नेपाली काँग्रेस चितवनले राज्यमन्त्री श्रेष्ठको गाडी तोडफोडको घटनाको छानबिन गरी दोषीलाई कारबाही गर्न माग गरेको छ ।
