काठमाडौं: नारायणगढ–मुग्लिन सडकको सिमलतालमा गत शुक्रबार पहिरोमा परी त्रिशूली नदीमा बेपत्ता भएका यात्रुमध्ये २० जनाको शव फेला परेको छ।
जसमा २ महिला र १८ पुरुष छन्। जिल्ला प्रहरी कार्यालय चितवनका डीएसपी भेषराज रिजालका अनुसार १४ शवको सनाखत भएको छ भने ६ जनाको सनाखत हुन सकेको छैन्।
रिजालका अनुसार अन्यको खोजी कार्य निरन्तर जारी छ। बसको कुनै संकेत अझै फेला परेको छैन्।
वीरगञ्जबाट काठमाडौँ आउँदै गरेको बागमती प्रदेश ०३–००६ ख १५१६ नम्बरको एन्जल डिलक्स र काठमाडौँबाट गौरतर्फ जाँदै गरेको बाग्मती प्रदेश ०३–०११ ख २५९५ नम्बरको गणपति डिलक्स बस गत असार २८ गते बिहान त्रिशूली नदीमा बेपत्ता भएका थिए। ती बसमा ६५ यात्रु सवार रहेको प्रहरीले जनाएको छ। जस मध्ये तीन जनाले ज्यान बचाउन सफल भएका थिए।
यस्तै गृहमन्त्रालयले गठन गरेको अध्ययन कार्यदल घटनास्थल पुगेको छ। टोलीले बङ्लादेशबाट गोताखोर ल्याउने गृहकार्य अगाडी बढेको समेत जानकारी गराएको छ।
