गायिका एलिना चौहान वैवाहिक जीवनको विषयलाई लिएर निरन्तर चर्चामा छिन्। हाल सामाजिक सञ्जालमा उनको वैवाहिक जीवनमा दरार आएको खबरले ठूलो ध्यान खिचेको छ।
वैशाख ५ गते बागलुङका विष्णु सापकोटासँग धूमधामले विवाह गरेकी एलिना, एक वर्ष नबित्दै विवाह सम्बन्धी प्रश्नहरूको सामना गर्नुपरेको छ। ओशोमार्गी बनेको समयदेखि नै यो विषयले चर्चा पाएको थियो। केही दिनअघि गायिका ज्योतिका मगरको फेसबुक स्टाटसले यसलाई थप बल पुर्यायो। ज्योतिले एक चर्चित गायिकाले हिंसा सहेको आशयको पोस्ट गरेकी थिइन्, जुन केही समयपछि डिलिट गरियो।
हालै मिडियामा एलिनाको डिभोर्सको चर्चा चलेपछि यो विषयले झन् धेरै ध्यान पाएको छ। एलिनाले भने आफू अहिले यस विषयमा केही बोल्न नचाहेको बताइन्। ‘यी कुराले मलाई धेरै टर्चर महसुस भइरहेको छ। एयरपोर्ट होस् वा सार्वजनिक स्थानमा, मसँग यही प्रश्नहरू गरिन्छन्। पब्लिक फिगर भएपछि यस्ता कुराहरू सामना गर्नुपर्ने रहेछ,’ उनले भनिन्।
उनले थपिन्, ‘अहिले म केही बोल्दिन, म एकदम तनावमा छु।’ मिडियाले आफ्नो निजी जीवनबारे निरन्तर समाचार बनाइरहेकोमा उनी असन्तुष्ट छिन्। एलिनाले अहिले श्रीमान् अस्ट्रेलियामा र आफू नेपालमा रहेको जानकारी गराइन्। अस्ट्रेलिया कहिले जाने भन्ने प्रश्नमा उनले अहिल्यै केही भन्न नसक्ने बताइन्।
चर्चित गायिका एलिना हाल विभिन्न कन्सर्टहरूमा व्यस्त छिन्। माघ महिनामा मात्र उनले २०-२५ वटा कार्यक्रम तय भएको जानकारी दिइन्।
