भरतपुर । चितवन रत्ननगरका प्राडा विश्वनाथ पौडेल नेपाल राष्ट्र बैंकको गभर्नरमा नियुक्त भएका छन् । सत्तारुढ सरकारका प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच भएको सहमतिले चितवन रत्ननगरका पौडेलले गभर्नर हुने अवसर पाएका हुन् । पौडेल यसअघि सिफारिस समितिमा थिए । उनले समितिबाट राजीनामा दिएपछि गभर्नर बन्ने ढोका खुलेको हो ।
पौडेल अर्थशास्त्री हुन् । नेपाली कांग्रेसका सभापति शेरबहादुर देउवा प्रधानमन्त्री हुँदा २०७८ सालमा पौडेल राष्ट्रिय योजना आयोगको उपाध्यक्षमा नियुक्त भएका थिए । पौडेल देउवाका विश्वासपात्र मानिन्छन् । सो समयमा पौडेलले चितवन क्षेत्र नं १ मा धेरै बजेट ल्याउन सफल भएका थिए । पौडेलले अर्थतन्त्रका विविध विषयमा जर्नलहरु समेत लेखेका छन् ।
लामो समयको रस्साकस्सीपछि पौडेल गभर्नर नियुक्त भएका हुन् । उनको नामलाई सिफारिस गर्न प्रधानमन्त्री केपी शर्मा ओली पनि सहमत भएका थिए । पौडेल नेपालका आर्थिक इतिहासबारे जानकार मानिन्छन् । समग्र चितवनको विकासमा पौडेलले गरेको योगदानको उच्च मूल्याङ्कन हुँदै आएको छ ।
अर्थशास्त्रमा विद्यावारिधि गरेका पौडेललाई अर्थशास्त्र, समाज र इतिहासका अध्येता मानिन्छ । अमेरिकाबाट अर्थशास्त्रमा स्नातकोत्तर गरेका पौडेल गभर्नर नियुक्त भएसँगै चितवनवासीले खुसी प्रकट गरेका छन् । विभिन्न क्षेत्रमा अर्थशास्त्रीको रुपमा काम गरेका पौडेलले केही समय सानिमा बैंकको निर्देशकका रुपमा समेत काम गरेका थिए ।
यसअघिको निर्वाचनमा पौडेल चितवन क्षेत्र नं १ मा नेपाली कांग्रेसबाट उमेदवार बनेका थिए । राष्ट्रिय स्वतन्त्र पार्टीका हरि ढकालसँग पौडेल पराजित भएका थिए । ढकालले कांग्रेसका प्राडा पौडेललाई र नेकपा एमालेका सुरेन्द्र पाण्डेलाई पराजित गरेका थिए ।
