रत्ननगर,असार ६- नेपाल स्काउटको ७४औं स्थापना दिवसको अवसरमा कालिका नगरपालिकास्थित सहपुर स्काउट दलको आयोजनामा प्रभात फेरी तथा टोल सरसफाइ कार्यक्रम सम्पन्न भएको छ।
“सफा टोल, सुन्दर समाज-स्काउटको साथ, परिवर्तनको सुरुवात” भन्ने मुल नाराका साथ कालिका नगरपालिकास्थित श्री माध्यमिक विद्यालय सहपुर अन्तर्गतको सहपुर स्काउट दलको आयोजना तथा कालिका ओपन स्काउट क्र्युको प्राविधिक सहयोगमा गरिएको उक्त कार्यक्रम सो विद्यालयका प्रधानाध्यापक तथा सहपुर स्काउट दलका संरक्षक प्रेमनाथ अधिकारीको अध्यक्षता रहेको थियो।
सहायक प्रधानाध्यापक कृष्णा अधिकारीको सहजिकरणमा आयोजित सो कार्यक्रममा कालिका वडा नं. २ कार्यालय परिसरदेखि बलरामपुर टोलसम्म प्रभात फेरि कार्यक्रम साथै सरसफाई गरिएको थियो।
कालिका ओपन स्काउट क्र्युका उपाध्यक्ष हरिकृष्ण श्रेष्ठको व्यवस्थापन र समन्वय रहेको सो कार्यक्रममा क्र्युका अध्यक्ष स्काउटर सेवक अधिकारी, स्काउटर अनिशा चौधरी , नर्सरी देखि केजी इञ्चार्ज लकु डोल्मा गुरुङ तथा सम्पूर्ण शिक्षक-शिक्षिका, क्र्युका रोभर रेन्जर र सहपुर स्काउट ट्रुपका स्काउट विद्यार्थीहरुको सकृय सहभागीता रहेको थियो।
कार्यक्रममा स्काउट विद्यार्थीहरुले सन्देशमूलक नृत्य समेत प्रस्तुत गरेका थिए।
