नेपाल प्रिमियर लिग (एनपिएल) मा सहभागि चितवन राइनोजले आफ्ना समर्थकलाई काठमाडौँ ल्याउन र फर्काउन निःशुल्क बस सेवा उपलब्ध गराउने व्यवस्था गरेको छ। खेल हुने दिन बिहानको खेलका लागि ५ बजे र दिउँसोको खेलका लागि ९ बजे चितवनबाट बस छुट्नेछ। खेल सकिएपछि समर्थकलाई पुनः चितवन ल्याइने छ। यसका लागि टिमले छ वटा बसको व्यवस्था गरेको छ र बस सेवामा अनलाइन टिकट भएका दर्शकलाई मात्र लैजाने योजना बनाइएको छ।
बस चितवन मेडिकल कलेज (सीएमसी) प्राङ्गणबाट छुट्नेछ र समर्थकलाई त्रिवि अन्तर्राष्ट्रिय क्रिकेट रंगशालामा पुर्याइनेछ। चितवन राइनोजको पहिलो खेल आज कर्णाली याक्ससँग बिहान ११:४५ बजे हुँदैछ। त्यसपछि टिमले मङ्सिर ४ गते लुम्बिनी लायन्स, मङ्सिर १० गते विराटनगर किङ्स, मङ्सिर १२ गते काठमाडौँ गोर्खाज, मङ्सिर १६ गते जनकपुर बोल्ट्स, मङ्सिर १८ गते सुदुरपश्चिम रोयल्स र मङ्सिर २० गते पोखरा एभेन्जर्ससँग खेल खेल्नेछ।
खेलको पूर्वसन्ध्यामा चितवन र आसपासका क्षेत्रमा चितवन राइनोजको समर्थनमा झण्डा, तुल, ब्यानर र स्टिकर टाँसिएको देखिन्छ, जसले टिमप्रतिको उत्साह र स्थानीय समर्थनलाई झल्काइरहेको छ।
