रबि बोपाराको अर्धशतकमा चितवन राइनोजको विजयी सुरुवात

२ मंसिर, काठमाडौं । नेपाल प्रिमियर लिग (एनपीएल) को दोस्रो संस्करणमा चितवन राइनोजले कर्णाली याक्सलाई चार विकेटले पराजित गर्दै विजयी सुरुवात गरेको छ। कर्णालीले दिएको १६७ रनको लक्ष्य चितवनले १९.१ ओभरमा १७१/६ रन बनाउँदै पूरा गर्‍यो।

चितवनका लागि रबि बोपाराले ३५ बलमा ५१ रन बनाउँदै टिमलाई मजबुत बनाएका थिए। ओपनर दीपक बोहराले ४२ रन र सैफ अली जैबले तेज ३८ रन जोडे। कर्णालीतर्फ सोमपाल कामीले २ विकेट हात पारे।

यसअघि टस हारेर पहिले ब्याटिङ गरेको कर्णालीले ३ विकेटमा १६६ रन बनाएको थियो। ओपनर पान्चलले ७ चौका र ६ छक्कासहित ७६ रनको उत्कृष्ट इनिङ खेले। ओ’डाउडले २०, मार्क वाटले १६ तथा पवन सर्राफले अविजित २७ रन जोडे। चितवनका सोहिल रनभीर, सैफ जैब र रबि बोपाराले समान एक–एक विकेट लिए। यो जितसँगै चितवनले एनपीएलमा कर्णालीविरुद्ध पहिलो जीत दर्ता गरेको छ।