बंगालको खाडीमा विकसित चक्रवातले भारतमा भारी वर्षाको चेतावनी, नेपालमा तत्काल कुनै ठूलो प्रभाव नपर्ने

बंगालको खाडीमा नयाँ चक्रवात विकास भएपछि भारतले अन्डमान र निकोबार क्षेत्रमा भारी वर्षाको चेतावनी जारी गरेको छ। भारतीय मौसम विभागका अनुसार टापु राज्यका केही स्थानमा ७ देखि २० सेन्टिमिटरसम्म वर्षा हुने सम्भावना उच्च छ। साथै नोभेम्बर २४ र २५ मा ती क्षेत्रमा ४०–५० किलोमिटर प्रतिघण्टाको तीव्र हावा, बिद्युत् चम्कन र आँधीसहितको मौसम रहने अनुमान गरिएको छ।

अन्डमान सागरमा हावाको गति ५५ किलोमिटर प्रतिघण्टासम्म पुग्ने पूर्वानुमानसमेत भारतीय अधिकारीहरूले गरेका छन्। चक्रवात नोभेम्बर २१ देखि थप तीव्र हुने सम्भावना रहेको भारतीय सञ्चारमाध्यमले जनाएका छन्। नेपालमा यसको प्रत्यक्ष प्रभावबारे मौसम पूर्वानुमान महाशाखाका मौसमविद् सञ्जीव अधिकारीले चक्रवात हाल त्यही क्षेत्रमै सीमित रहेको बताए। “कम्तीमा तीन दिनसम्म नेपालमा कुनै ठूलो असर देखिँदैन,” अधिकारीले भने। उनका अनुसार चक्रवातको आंशिक प्रभावले केही बादलयुक्त अवस्था मात्र सिर्जना हुन सक्छ। “यो चक्रवात उत्तरी दिशातिर धेरै माथि आएर असर गर्ने संकेत देखिएको छैन,” उनले स्पष्ट पारे।