बंगलादेशमा ५.७ म्याग्निच्युडको भूकम्प, ३ को मृत्यु र २०० भन्दा बढी घाइते

मंसिर ५, २०८२, काठमाडौँ । शुक्रबार बिहान बंगलादेशमा ५.७ म्याग्निच्युडको भूकम्प गएको छ। यस भूकम्पमा अहिलेसम्म तीन जनाको मृत्यु पुष्टि भएको छ भने २०० भन्दा बढी घाइते भएका छन्।भूकम्पको केन्द्रबिन्दु ढाकाबाट करिब २५ किलोमिटर टाढा रहेको नरसिंदीको माधबादी क्षेत्रमा थियो। भूकम्प यति शक्तिशाली भएको थियो कि दर्जनौँ भवन ढल्किएका छन् र सडकमा मानिसहरू भागेर निस्किएका थिए।

भूकम्पका कारण गाजिपुरस्थित श्रीपुरमामा रहेको डेनिमेक नामक कपडा कारखानामा भागदौड मच्चिँदा १५० भन्दा बढी कामदार घाइते भएका छन्। उनीहरूलाई श्रीपुर उपजिल्ला स्वास्थ्य केन्द्रमा भर्ना गरिएको छ। स्थानीय सञ्चारमाध्यमले ६ जनाको मृत्यु भएको दाबी गरे पनि प्रहरीले अहिलेसम्म ३ जनाको मात्र पुष्टि गरेको छ। भूकम्पको धक्का छिमेकी भारतको कोलकातामा पनि २० सेकेन्डसम्म महसुस गरिएको थियो, तर अहिलेसम्म त्यहाँ कुनै क्षतिको रिपोर्ट आएको छैन।

यस भूकम्पका कारण बंगलादेश–आयरल्यान्ड अन्तर्राष्ट्रिय क्रिकेट खेल पनि रोकिएको छ।