बारामा भएको यस घटनाले उद्योग–व्यवसायमा बढिरहेको आन्तरिक विवादको खतरनाक रूपलाई पुनः उजागर गरेको छ। प्रसौनी गाउँपालिका–६ भलुही चोक नजिक रहेको किरण बेभरेज नेपाल प्रालिका म्यानेजर रामकिशोर सिंह मंसिर १२ गते बिहान उद्योगदेखि करिब २५ मिटर उत्तरको खाल्डोमा मृत अवस्थामा फेला परे। उनको शरीरमा धारिलो हतियार र इँटाले प्रहार गरेको भेटिएपछि प्रहरी तत्काल अनुसन्धानमा जुटेको थियो। छिट्टै सुरु गरिएको अनुसन्धानबाट प्रहरीले वीरगन्जका २१ वर्षीय राजनकुमार राम र ३२ वर्षीय प्रामोद साह तुरहालाई घटनामा संलग्न देखेर पक्राउ गर्यो। राजनकुमार उद्योगमा सवारी चालकका रूपमा काम गर्थे।
गत वर्ष गढीमाई मेलाको क्रममा गाडीको क्लच जलाएको निहुँमा म्यानेजरसँग विवाद भएको थियो। पछि उनले जागिर छाडे पनि कात्तिक १ गतेदेखि मंसिर १० गतेसम्म पुनः काम गरेका थिए।उद्योगले तोकेको दरभन्दा महँगोमा पानी बेच्दै आएको कुरा म्यानेजरले पत्ता लगाएपछि मंसिर १० गते राजनकुमारलाई हटाइयो, र यही रिसले हत्याको योजना जन्मिएको प्रहरीले जनाएको छ।
मंसिर ११ राति साथी प्रामोदसँग मदिरा सेवन गरेपछि उनीहरूले धारिलो हतियार लिएर उद्योगभित्रै रामकिशोरमाथि आक्रमण गरेका थिए। भारत भाग्दै गरेका दुवैलाई प्रहरीले १६ घण्टाभित्रै नियन्त्रणमा लिएको छ। अहिले उनीहरूमाथि कर्तव्य ज्यान मुद्दामा अनुसन्धान अघि बढाइएको छ।
