नेपालमा सन् २०२५ को नोभेम्बर महिनामा विदेशी पर्यटक आगमन उल्लेखनीय रूपमा बढेको देखिएको छ। नेपाल पर्यटन बोर्डले सार्वजनिक गरेको तथ्याङ्क अनुसार नोभेम्बरमा कुल १,१६,५५३ पर्यटक नेपाल आएका छन्। यो संख्या गत वर्षको यही अवधिका तुलनामा उच्च मानिएको छ।
पर्यटक स्रोत मुलुकहरूमध्ये भारत पहिलो स्थानमा रह्यो। भारतबाट मात्र १८,९९५ पर्यटक नेपाल आएका थिए, जबकि ११,२५४ पर्यटकसहित संयुक्त राज्य अमेरिका दोस्रो ठूलो स्रोत मुलुकका रूपमा उभिएको छ।
त्यसपछि चीन (७,८७१), बेलायत (७,१८९), बङ्गलादेश (५,६५३), अष्ट्रेलिया (५,३९३), श्रीलङ्का (४,८३१), म्यानमार (४,४८४), फ्रान्स (४,२११) र जर्मनी (४,१३४) प्रमुख रूपमा रहेका छन्।
क्षेत्रगत आधारमा हेर्दा दक्षिण एसियाली राष्ट्रहरूबाट ३०,८७०, अन्य एसियाली मुलुकबाट २८,६१३, युरोपबाट ५,८९१, अमेरिकाबाट १३,६७८, मध्यपूर्वका मुलुकबाट १,८०२, अफ्रिकाबाट ४१२ र अन्य मुलुकबाट ६,२६९ पर्यटक नेपाल आएका थिए।
जनवरीदेखि नोभेम्बरसम्म नेपालको भ्रमण गर्ने विदेशीहरूको संख्या १० लाख ६० हजार २६९ पुगेको छ, जसले यो वर्षको पर्यटन क्षेत्र रिकभरीतर्फ अग्रसर भइरहेको संकेत दिएको छ।
अक्टोबर महिना यस वर्षको सबैभन्दा सक्रिय पर्यटन सिजन बन्न पुगेको थियो, जसमा मात्र १,२८,४४३ पर्यटकले नेपाल भ्रमण गरेका थिए।
सेप्टेम्बरमा ७८ हजार र अगस्टमा ८८ हजार ६८० पर्यटक भित्रिएका थिए, जसले पछिल्ला महिनाहरूमा पर्यटक आगमन दर स्थिर रूपमा बढिरहेको देखाउँछ।
