अमेरिकी राष्ट्रपति डोनाल्ड ट्रम्प र भेनेजुएलाका राष्ट्रपति निकोलस मदुरोबीच नोभेम्बर २१ मा भएको करिब १५ मिनेटको टेलिफोन संवादले मदुरोको ‘सुरक्षित निकास’ खोज्ने सम्भावना झनै सिमित बनाएको अन्तर्राष्ट्रिय समाचार संस्था रोयटर्सले जनाएको छ। महिनौंदेखि अमेरिकाले भेनेजुएलामाथि दवाब बढाइरहेको अवस्थामै गरिएको उक्त वार्तामा मदुरोले आफू र परिवारलाई कानुनी माफी दिलाइदिन, सबै प्रतिबन्ध हटाइदिन र अन्तर्राष्ट्रिय अपराध न्यायालयमा चलिरहेका मुद्दा खारेज गरिदिन माग गरेका थिए। उनले १०० भन्दा बढी भेनेजुएलाली अधिकारीमाथिका प्रतिबन्ध हटाउन तथा नयाँ निर्वाचनअघि उपराष्ट्रपति डेल्सी रोड्रिगेज नेतृत्वमा अन्तरिम सरकार चलाउन अनुमति दिन पनि अनुरोध गरेका थिए।
तर ट्रम्पले यीमध्ये अधिकांश माग अस्वीकार गर्दै मदुरोले चाहेको कुनै पनि देशमा परिवारसहित जान एक साताको समय मात्र दिएको स्रोतहरूले जनाएका छन्। ट्रम्प प्रशासनले पहिलेबाटै मदुरोलाई वैध राष्ट्रपति नमान्दै आएको छ। पछिल्ला महिनामा अमेरिकाले भेनेजुएलालाई लागुऔषध तस्करीमा संलग्न रहेको आरोप लगाउँदै क्यारेबियन क्षेत्रमा ठूलो संख्यामा पनडुब्बी र युद्धपोत पठाएको थियो, जसले मदुरोलाई आफ्नो सुरक्षाबारे झन् सशंकित बनाएको छ।
यता, अमेरिकाले मदुरो विरुद्ध अन्तर्राष्ट्रिय दबाब अभूतपूर्व रूपमा बढाउँदै आएको छ—उनका विरुद्धको ‘पुरस्कार रकम’ पाँच करोड डलरसम्म दोब्बर पारेको छ, साथै भेनेजुएलाका दुईवटा लागुऔषध तस्कर समूहलाई विदेशी आतंकवादी संगठन घोषणा गरेको छ। यस्तो पृष्ठभूमिमा मदुरोले देश छाड्ने ‘सम्झौतामूलक निकास’ खोजिरहे पनि विकल्पहरू तीव्र रूपमा घटिरहेका विश्लेषण गरिएको छ।
