जेनजी आन्दोलन संस्थागत गर्ने सम्झौतामा हस्ताक्षर लगत्तै प्रधानमन्त्री कार्यालयमा जेनजीहरूको समूहले विरोध प्रदर्शन गर्दै सम्झौता पत्र च्यातिदिएका छन्। उनीहरूले सम्झौताले आफ्नो माग पूरा नगर्ने भएकाले यस्तो कदम उठाएको जितेन्द्रकुमार महतोले बताएका छन्।
महतोले भने, “यो सम्झौताको ड्राफ्टमा हाम्रो संलग्नता थिएन। हाम्रो राख्नुपर्ने बुँदाहरू राखिएको छैन। दुई–चार जना जेनजी भोलिन्टियर राखेर हामीलाई बोल्नै दिइएन।” उनले आफूहरूले माग समेट्न चाहेको विषय खुलाएनन्। यसअघि मंसिर ८ गते पनि जेनजीहरूले प्रधानमन्त्री कार्यालयमा हुलदंगा मच्चाएका थिए भने खेलकुद मन्त्रालयमा समेत पिटापिट गरेको थियो। बुधबारको विरोधमा मुख्य रूपमा जितेन्द्रकुमार महतो र सुप्रिया राज्यलक्ष्मी शाही देखिएका थिए।
काउन्सिल अफ जेनजीका कोसी प्रदेश संयोजक उपार्जुन चाम्लिङका अनुसार सम्झौतामा ‘राजा’ शब्द नदेखिएको र हस्ताक्षर लगत्तै सुरु भएको विवादले जेनजीहरूलाई भड्काएको हो। उनले भने, “सम्झौता गर्ने बेलामा के छ, के छैन भन्ने कुरा पूर्वजानकारी हुनु पर्थ्यो।” सम्झौता हस्ताक्षर समारोहमा सरकारतर्फ प्रधानमन्त्री सुशीला कार्की र जेनजीतर्फ सहिद परिवारका भोजबिक्रम थापा उपस्थित थिए। नेपाल जेनजी फ्रन्ट, काउन्सिल अफ जेनजी, जेनजी मुभमेन्ट अलायन्सका जेनजी, घाइते जेनजी र सहिद परिवारको उपस्थितिमा सयभन्दा बढी हस्ताक्षर भएको थियो।
हस्ताक्षरपछि जेनजी प्रतिनिधि मिराज ढुंगानाले सम्झौताको विरोध गर्दै विज्ञप्ति जारी गरे। उनले सम्झौता प्रमुख माग स्पष्ट र ठोस रूपमा नसमेटेको आरोप लगाउँदै, “यो सम्झौता आन्दोलन तुहाउने षड्यन्त्र र भ्रमपूर्ण हो, हामी यसलाई समर्थन गर्न असमर्थ छौँ,” बताएका छन्।
