भौतिक पूर्वाधार तथा यातायात मन्त्री कुलमान घिसिङले तनहुँको आँबुखैरेनी–५ र चितवनको भरतपुर–२९ जोड्ने अलपत्र घुमाउने पुलको निरीक्षण गर्दै निर्माण व्यवसायीलाई एक महिनाभित्र काम सुरु गर्न निर्देशन दिएका छन्। मन्त्री घिसिङले भने, “घुमाउने पुल जसरी पनि निर्माण गर्नुपर्नेछ। काम नगर्ने भए ठेक्का तोड्न बाहेक विकल्प छैन।”
उनले पुलको डिजाइन परिवर्तन गरिएको विषयमा सडक विभागलाई तत्काल स्वीकृति दिन निर्देशन दिएका छन् र ठेकेदारले नौ वर्षसम्म काम नगरेकोमा असन्तोष व्यक्त गरेका छन्।
घुमाउने पुलको निर्माण २०७० सालमा सम्झौता भए पनि बारम्बार म्याद थप र डिजाइन परिवर्तनपछि २०७५ माघमा पुनः सम्झौता गरिएको थियो। अहिलेसम्म करिब ५० प्रतिशत काम मात्र सम्पन्न भएको सडक डिभिजनले जनाएको छ।
पुल १०५ मिटर लामो, ११ मिटर चौडा हुनेछ र फुटपाथ पनि रहनेछ। निर्माण पूरा भएपछि पोखरा–दमौलीबाट नारायणगढ आउन जाने दूरी २३ किलोमिटर छोटो हुने छ। हाल मोटरेबल पुल नहुँदा यातायातका साधन तनहुँको सिमानामा पुगेर फर्कन बाध्य छन्।
मन्त्री घिसिङले राष्ट्रिय स्तरमा बारम्बार चर्चा हुने यस पुल राष्ट्रपति चासोमा रहेको स्मरण गराउँदै काम तुरुन्त सुरु गर्न ठेकेदारलाई चेतावनी दिएका हुन्।
