नेपालमै जन्मे–हुर्केका दुई हात्ती रूद्रकली र खगेन्द्रप्रसादलाई नेपाल सरकारले इतिहासमै पहिलो पटक अन्य देशलाई उपहारका रूपमा पठाएको छ। बुधबार राति उनीहरू कतार एयरको चार्टर जहाजमार्फत भैरहवाबाट दोहा पुगेका हुन्।
करिब साढे चार घन्टाको उडान सुरक्षित बनाउन हात्तीलाई उडानअघि अर्धबेहोस बनाउने औषधि प्रयोग गरिएको थियो। वन्यजन्तु विज्ञहरूका अनुसार औषधिको असरले हात्तीहरू ‘झुम्म’ अवस्थामा रहेकाले उडानका क्रममा चलमलाएका थिएनन्। यसले जहाजको सन्तुलनमा कुनै समस्या आएन।
चितवन राष्ट्रिय निकुञ्जका प्रमुख संरक्षण अधिकृत डा. गणेश पन्तका अनुसार हात्तीको तौल धेरै हुने र थोरै हलचलले पनि जहाजलाई असर पर्न सक्ने भएकाले लठ्याउने औषधि प्रयोग गरिएको हो। ‘औषधि प्रयोग गरेपछि हात्ती अस्वाभाविक गतिविधि गर्दैनन्, त्यसैले लामो यात्रामा सुरक्षित रूपमा लैजान सकिन्छ,’ उनले बताए।हात्तीहरूलाई पठाउन राष्ट्रिय प्रकृति संरक्षण कोषले दुई महिनाभन्दा बढी समय लगाएर विशेष खोर निर्माण गरेको थियो। सोही खोरमा राखेर सोमबार चितवनको सौराहाबाट भैरहवा पुर्याइयो र बुधबार अपराह्न कतार पठाइयो। स्थलमार्गको यात्रामा भने औषधि प्रयोग गर्नु परेन।
२०८१ वैशाख ११ र १२ गते कतारका अमिर शेख तमिम बिन हमाद अल थानीको नेपाल भ्रमणका क्रममा नेपाल सरकारले एक जोडी हात्ती उपहार दिने निर्णय गरेको थियो। त्यसअनुसार हात्ती प्रजनन् तथा तालिम केन्द्र खोरसोरमा हुर्काइएका र तालिम प्राप्त रूद्रकली (७ वर्ष) र खगेन्द्रप्रसाद (५ वर्ष) छनोटमा परेका हुन्। सौराहाबाट बिदाइ गर्दा वैदिक विधिअनुसार पूजा गरी फूलमाला लगाइएको थियो। रूद्रकलीका माउते बुद्धिलाल श्रेष्ठ र खगेन्द्रप्रसादका माउते पाचुखा थारू हात्तीहरूसँगै कतार गएका छन्। साथै एक जना भेटेरिनरी प्राविधिक पनि पठाइएको निकुञ्जले जनाएको छ।
नेपालले यसअघि एकसिंगे गैंडा, घडियाल तथा गोहीका अन्डासहित विभिन्न ४७ प्रकारका वन्यजन्तु तथा आखेटोपहार अन्य देशलाई उपहार दिइसकेको छ। तर हात्ती उपहार दिएको भने यो पहिलो पटक हो।
