नारायणी एक्सपो २०८२ मा सुनिल पण्डित, रेजिना बिसी र यश कुमारको प्रस्तुति रहने

चितवन । पुस ३० गतेदेखि सुरु भएको नारायणी एक्सपो २०८२ मा दर्शकको आकर्षण बढ्दै गएको छ । एक्सपो अन्तर्गत माघ ७ गते (बुधबार) चर्चित लोकप्रिय भोजपुरी गायक सुनिल पण्डित ले विशेष सांगीतिक प्रस्तुति दिने भएका छन् । उनले नारायणी किनारलाई आफ्नो प्रस्तुतिमार्फत तताउने आयोजकले जनाएको छ ।

भोजपुरी गायक पण्डितसँगै लोकदोहोरी क्षेत्रकी चर्चित गायिका रेजिना बिसी को पनि प्रस्तुति रहने रेड रक इभेन्ट का अध्यक्ष विकल क्षेत्री ले जानकारी दिए । उनका अनुसार एक्सपोमा दैनिक अवलोकनकर्ताको संख्या क्रमशः वृद्धि हुँदै गएको छ ।

एक्सपोको प्रमुख आकर्षणका रूपमा अमेरिकाको स्ट्याचु अफ लिबर्टीको प्रतिरूप राखिएको छ । उक्त लिबर्टीमा फोटो खिच्ने दर्शकको संख्या उल्लेख्य रूपमा बढेको आयोजकले जनाएको छ । भोलिदेखि दर्शकको संख्या झनै बढ्ने अपेक्षा आयोजकले लिएका छन् । चितवनमा सञ्चालन भएका अन्य महोत्सवहरू सकिएकाले नारायणी किनारमा थप भीड बढ्ने विश्वास गरिएको छ ।

यसैगरी, भोलि चर्चित गायक यश कुमार को पनि विशेष प्रस्तुति रहनेछ । एक्सपो अवधिभर राष्ट्रिय तथा स्थानीय कलाकारहरूका साथै जादुगरहरूको मनोरञ्जनात्मक प्रस्तुति समेत रहने आयोजकले बताएका छन् ।

नारायणी एक्सपो २०८२ ले मनोरञ्जनसँगै पर्यटन, संस्कृति र स्थानीय उत्पादनको प्रवर्द्धनमा महत्वपूर्ण योगदान पुर्‍याउने अपेक्षा गरिएको छ ।