जानुका दुवाडी/ चितवनको कृषि तथा वनविज्ञान विश्वविद्यालय रामपुरमा आजदेखि एसिया क्षेत्रीय बाख्रा विज्ञको सम्मेलन सुरु हुँदैछ । ‘विकासशील विश्वमा खाद्य तथा पोषण सुरक्षाका लागि बाख्रापालन’ भन्ने मूल नाराका साथ शुरु हुने सम्मेलनमा १७ देशका ३ सय भन्दा धेरै विज्ञको सहभागिता रहने कृषि तथा वनविज्ञान विश्वविद्यालयले जनाएको छ ।
सम्मेलनमा नेपाल, चीन, भारत, पाकिस्तान, बंगलादेश, अमेरिका, क्यानडा, क्युबा, जापान, हंगेरी, इटाली, इन्डोनेसिया, फ्रान्स, केन्या, अष्ट्रेलिया, स्पेन र फ्रान्सका १७ वटा देशका बाख्रा अनुसन्धान र विकासमा विशिष्ट योगदान दिएका सफल वैज्ञानिक, अनुसन्धानदाता, उद्यमी, विद्यार्थी र किसान प्रतिनिधिको सहभागिता रहने मूल आयोजक समितिका अध्यक्ष प्राध्यापक शारदा थपलियाले जानकारी दिनुभयो ।
सम्मेलनमा १ सय १७ भन्दा धेरै कार्यपत्र प्रस्तुत हुने आयोजकले जनाएको छ । बाख्रामा लाग्ने पीपीआर रोग र त्यसको नियन्त्रण, बाख्रा पालन र भ्याक्सिन व्यवसायमा महिला सहभागीता जस्ता विषयमा सम्मेलनमा छलफल हुनेछ । सम्मेलन ६ गते सकिनेछ । नेपालमा पशु चौपायमध्ये सबैभन्दा धेरै १ करोड २८ लाख बाख्रा रहेका छन् ।
