०९ माघ २०७६, काठमाडौं
गण्डकी प्रदेशका सांसद राजीव गुरुङ उर्फ ‘दीपक मनाङे’लाई प्रहरीले पक्राउ गरेको छ । उनलाई पक्राउ पुर्जी जारी भएको केही समयमै प्रहरीले बिहीबार पक्राउ गरेको हो । उनलाई बिहीबार प्रहरीले लेकसाइडस्थित एक होटलबाट पक्राउ गरेका हुन् । अदालतले बिहीबार उनका नाममा पक्राउ पुर्जी जारी गरेको थियो ।
मनाङेले आयोजक एन्फा कास्कीका अध्यक्ष मिलन गुरुङलाई तीन झापड हानेका थिए । मनाङेले झापड हानेको स्वीकार गरेका छन् । उनी बुधबार पत्रकार सम्मेलनमा भनेका थिए, “मैले हातपात गरेको होइन, झापट हानेका हो ।”
मिलन गुरुङले भने बुधबार जिल्ला प्रहरी कार्यालयमा पुगेरै मनाङेविरुद्ध किटानी जाहेरी दिएका थिए । पीडित गुरुङले जाहेरी दिनुपूर्वको पत्रकार सम्मेलनमा शान्ति सुरक्षा, सार्वजनिक स्थलमा हातपात गरेको, विभिन्न आरोपहरू लगाएर आफनो चरित्र हत्या गर्ने काम गरेको र आफ्नो जिउ धनको सुरक्षा हुनुपर्ने बताएका थिए । अनुसन्धानको क्रममा आवश्यक परेका कदम उठाउने प्रहरीले जनाएको छ ।
