भरतपुर/उद्योग वाणिज्य तथा उपभोक्ता हित संरक्षण निर्देशनालय मकवानपुरको स्वीकृत वार्षिक कार्यक्रम अनुसार प्रदेश नं.३ का लघु, घरेलु तथा साना उद्योगको उपजको बिक्रीका लागि भरतपुर १० प्रदर्शनीमार्ग, चितवन स्थित चितवन उद्योग संघको परिसर भित्र निर्माण गरिने बिक्री केन्द्रको तयारी अन्तिम चरणमा पुगेको छ ।
घरेलु तथा साना उद्योग कार्यालय चितवनमा आइतबार सम्पन्न छलफलबाट बिक्री केन्द्रको कार्य सञ्चालन गर्नको लागि फागुन महिनादेखि काम शुरु गर्ने गरी टेण्डर लगायतका अन्य प्रक्रिया अगाडि बढाइने निर्णय समेत भएको थियो ।
मौलाकालिका सिभिल वक्र्सले तयार गरेको थ्रीडि सहितको प्रस्ताव प्रपोजल माथि छलफल भएपछि उक्त परियोजनालाई डिपिआर र कार्य अगाडि बढाउन सम्बन्धित निकायसँग पठाइएको थियो ।
छलफल कार्यक्रममा उद्योग, वाणिज्य तथा उपभोक्ता हित संरक्षण निर्देशनालय प्रदेश नं. ३ का निर्देशक नेत्र प्रसाद भट्टराई, चितवन उद्योग संघका अध्यक्ष राजु पौडेल, घरेलु तथा साना उद्योग कार्यालय चितवनका प्रमुख उद्योग अधिकृत रमेश कर्माचार्य, चितवन उद्योग संघका उपाध्यक्षहरु त्रिलोचन कँडेल, सूर्यप्रसाद न्यौपाने, मदन घिमिरे, युग राज वस्ती, कन्सल्टिङ कम्पनी मौलाकालिका सिभिल वक्र्सका तर्फबाट इन्जिनियर रोचक अधिकारीलगायतको उपस्थिति रहेको थियो ।
