एक अस्पताल र रेडक्रसको लापरवाहीले जनकपुरमा एक सुत्केरीको ज्यान गएको छ ।जनकपुरस्थित रामजानकी अस्पतालमा एक सुत्केरी महिलालाई फरक रगत समूहको रगत चढाउँदा ज्यान गएको हो ।महोत्तरी गौशाला नगरपालिका-११ भरतपुरकी २३ वर्षीया गंगादेवी महतोको फरक रगत समुहको रगत चढाउदा मृत्यु भएको परिवारजनको दाबी छ ।
‘ओ’ पोजिटिभ ब्लड ग्रुपको साटो ‘बी’ पोजिटिभ ब्लड चढाउँदा बिहीबार राति गंगा देवीको मृत्यु भए पनि घटना शुक्रवार सार्वजनिक भएको हो शल्यक्रियामा रगत अभाव भएपछि अस्पतालले सुत्केरीको रगत सेम्पलसहित रगत लिन आफन्तलाई रेडक्रसमा पठाएको थियो ।रेडक्रसले दिएको रगत चढाएपछि सुत्केरी झनै सिकिस्त हुँदा चेकजाँच गरेपछि ओ पोजिटिभको ठाउँमा बी पोजिटिभ रगत चढेको पत्ता लागेको थियो ।
अस्पतालले भने अनुसार नै नमूना लिएर गएर रेडक्रसबाट रगत ल्याएको र त्यहिँ मध्ये एउटा पोका बी पोजिटिभ रगत अस्पतालले चढाएको थियो ।अस्पताल प्रशासनले रेडक्रसको लापरबाहीले सुत्केरीको जिउमा ओको ठाउँमा बी पोजिटिभ चढेको दावी गरेको छ।गलत समूहको रगत चढाएपछि एक सुत्केरीको मृत्यु भएको अभियोगमा दुई चिकित्सकलाई प्रहरीले पक्राउ गरेको छ ।अस्पताल र रेडक्रसको चरम लापरवाहीको कारण मृत्यु भएको भन्दै आफन्तले कडा कारवाहीका साथै क्षतिपूर्तिको माग गरेका छन्।
