काठमाडौं । प्रधानमन्त्री केपी शर्मा ओलीले मन्त्रिमण्डल पुनर्गठनको आन्तरिक तयारी थालेको बुझिएको छ । पार्टी विवाद सुल्झ्याउन ६ नेता सम्मिलित कार्यदल गठनपछि नेकपाका अध्यक्ष समेत रहेका प्रधानमन्त्री ओलीले मन्त्रिमण्डल पुनर्गठनका लागि आन्तरिक छलफल सुरु गरेको बालुवाटार स्रोतले जनाएको छ । पार्टीभित्र देखा परेको विवाद समाधान गर्न शुक्रबार महासचिव विष्णु पौडेलको संयोजकत्वमा ६ सदस्यीय कार्यदल गठन गरेका थिए ।
बालृुवाटार उच्च स्रोतका अनुसार शनिबारबाट काम थालेको कार्यदलले केही दिनमै अध्यक्षद्वय ओली र पुष्ककमल दाहाल प्रचण्डलाई बुझाउने प्रतिवेदनका आधारमा मन्त्रिमण्डल पुनर्गठन गर्ने प्रधानमन्त्रीको तयारी छ । शुक्रबार अध्यक्षद्वयबीच भएको छलफलमा सरकारले नियुक्ति र आधारभूत नीतिमा पार्टीसँग सल्लाह गर्ने, मन्त्रिपरिषद्को पुनर्गठन, मुख्यमन्त्री हेरफेर र सांगठनिक काम टुंग्याउने सहमति भएको थियो ।
स्रोतका अनुसार दुई अध्यक्षबीच शक्तिको बाँडफाँड गर्ने क्रममा ओलीले सरकार चलाउने र प्रचण्डले पार्टी चलाउने गरी पहिलो खाका बन्नेछ । त्यसपछि महाधिवेशन र मन्त्रिमण्डल पुर्नगठन तथा केही मुख्यमन्त्रीहरु फेरवदल गर्नेगरी कार्यदलले खाका तयार गर्नेछ ।
योसँगै प्रधानमन्त्री ओलीले मन्त्रिमण्डल पुनगर्ठनको विषयमा आन्तरिक गृहकार्य सुरु गरेका हुन् । पार्टीभित्रको शक्ति सन्तुलन कायम गर्न केन्द्रीय सरकारका केही मन्त्री र केही मुख्यमन्त्री जिम्मेवारी हेरफेर गरिन लागिएको स्रोतको भनाइ छ ।
मन्त्रिमण्डल पुनर्गठनको आवाज नेकपाभित्र धेरै पहिलेदेखि नै उठ्दै आएकाले पार्टीमा देखिएको पछिल्लो विवाद मथर पार्न र सन्तुलन मिलाउन प्रधानमन्त्री तयार देखिएका छन् । समग्र पार्टी पद्धति तथा सरकारका काम प्रभावकारी बनाउन पनि कार्यदलले मन्त्रिमण्डल र केही मुख्यमन्त्रीको जिम्मेवारी हेरफेर गर्ने विकल्प पेस गर्ने भएपछि यो विषयमा चार्चामा आएको छ ।
बालुवाटर स्रोतले भन्यो , ‘केही केन्द्रीय मन्त्री र मुख्यमन्त्रीको हेरफेर गर्न प्रधानमन्त्री तयार देखिनु भएको छ । त्यही अनुसार कार्यदललाई कार्यदेश दिइने छ । तर कार्यदलले तयार पाएको प्रतिवेदनमा टेकेर केही मन्त्री र मुख्यमन्त्रीलाई हटाउने निश्चित छ । नयाँ मन्त्री र मुख्यमन्त्रीबारे पनि छलफल चलिरहेको छ ।’
तर पार्टी विभित्र शक्ति सन्तुलन मिलाउन यो कार्य गरिने भएकाले शीर्ष नेताहरुको राय अनुसार कसलाई हटाउने र कसलाई जिम्मेवारी दिने भन्ने विषय टुंग्याइने स्रोतको भनाइ छ । वरिष्ठ नेता माधवकुमार नेपाल र झलनाथ खनाललाई पनि मान्य हुनेगरी सहमतिको खाका बनाउने विषयमा दुई अध्यक्षबीच सहमति भैसकेकाले पनि मन्त्रीहरुको हेरफेर निश्चित छ ।
स्रोेतका अनुसार २ वर्ष मन्त्री भैसकेका र राम्रो परफमेन्स देखाउन नसकेका झण्डै सातदेखि १० जना मन्त्री परिवर्तन हुने बुझिएको छ । उनीहरुको स्थामा स्थानमा नारायणकाजी श्रेष्ठ, भीम रावल, सुरेन्द्र पाण्डे, जनार्दन शर्मा, पम्फा भुषाल, देवेन्द्र पौडेल, महेश बस्नेत, प्रभु साह, प्रेम आले, विशाल भट्टराई लगायतलाई मौका दिने विषयमा ओली र प्रचण्डबीच छलफल जारी छ ।
गृहमन्त्री रामबहादुर थापा, पराराष्ट्रमन्त्री प्रदीप ज्ञवाली, वनमन्त्री शक्ति बस्नेत, श्रममन्त्री रामेश्वर राय यादव, अर्थमन्त्री युवराज खतिवाडा, भूमि सुधारमन्त्री पद्मा अर्याल, स्वास्थ्यमन्त्री भानुभक्त ढकाल, शिक्षमा मन्त्री गिरिराजमणि पोखरेल र खानेपानीमन्त्री विना मगरलगायतलाई फिर्ता बोलाउने तयारी भइरहेको छ ।
तत्कालीन माओवादी निकट मन्त्रीहरुलाई फिर्ता बोलाउन बुहारी विना मगरलाई पनि फिर्ता बोलाउनु पर्ने प्रचण्डलाई बाध्यता खडा भएको बुझिएको छ । त्यस्तै प्रदेश ३ का मुख्यमन्त्री डोरमणि पौडेल र १ का शेरधन राईको ठाउँमा नयाँ मुख्यमन्त्रीको खोजी हुन थालेको छ । यस्तै आवश्यक परे आफू पनि मुख्यमन्त्रीबाट राजिनामा दिन तयार भएको भन्दै प्रदेश ५ का मुख्यमन्त्रीले बताउँदै आएका छन् । उनको पद भने जाने नजाने निश्चित भएको छैन । द नेपाल टप
