धनगढी । धनगढीको त्रिनगर माध्यमिक विद्यालयले राउटे जातिका तीन जनाका विद्यार्थीलाई छात्रवृत्तिमा अध्यापन गराउने भएको छ । डडेल्धुरा जिल्लाको पर्शुराम न.पा.को आमपानीका देबु राउटे, कलावती राउटे र पार्वती राउटेलाई छात्रवृत्तिमा अध्यापन गराउने भएको हो । देबु राउटे कानुन र बाँकी २ जनाले शिक्षा संकायमा भर्ना भएका छन् ।
प्रत्येक विद्यार्थीबाट रु १ हजार मात्र लिएर बाँकी सबै शुल्क छुट गरि कक्षा १२ सम्म निःशुल्क अध्यापन गराउने त्रिनगर माध्यमिक विद्यालयका प्रध्यानाध्यापक भूपाल सिंह खड्काले जानकारी गराएका छन् । आर्थिक अवस्था कमजोर भएकाले तीनै जना विद्यार्थीलाई धनगढीबाट घर जान गाडी भाडा पनि नभएकाले सहयोग स्वरुप विद्यालयका प्रअ खड्काले जनही १-१ हजारका दरले ३ हजार रकम प्रदान गरेका छन् । यसै गरि कक्षा ११-१२ तर्फका ईन्चार्ज गोविन्दराज उपाध्यायले छात्रवृत्ति स्वरुप तीनै जनालाई जनही १-१ हजारका दरले ३ हजार रकम प्रदान गरेका छन् ।
नव आगन्तुक विद्यार्थी देबु मोडलिङका साथै गायन क्षेत्रमा पनि संघर्षरत छिन् । उनले एउटा गीतमा मोडलिङ गर्नुका साथै अर्को एक गीतमा स्वर दिइसकेकी छिन् । कक्षा १ देखि १० सम्म भर्ना शुल्क, मासिक शुल्क, परीक्षा शुल्क लगायत कुनै पनि शुल्क नलिई पूर्ण निःशुल्क पढाउने त्रिनगर मा.वि. सम्भवत: नेपालको एक मात्र सामुदायीक विद्यालय हो । कक्षा ११/१२ मा पनि मासिक शुल्क रु ३ सय रहेको यस विद्यालयले भर्ना शुल्क लिने गरेको छैन भने वार्षिक शुल्क स्वरुप कक्षा ११ को रु २ हजार र कक्षा १२ को रु १ हजार रहेको कुरा विद्यालयका शिक्षक प्रतिनिधी नेत्र खडायतले जानकारी गराएका छन् । आर्थिक र सामाजिक रुपले पछाडी परेका यस्ता लोपन्मुख जातिका विद्यार्थीहरुको थप छात्रवृत्तिका लागि धनगढी उपमहानगरका नगर प्रमुखसँग पनि समन्व्य गरिने धनगढी उपमहानगरपालिकाको शिक्षा समितीका सदस्य समेत रहेका प्रअ खड्काले बताउनु भयो ।
