काठमाडौं – शिक्षा, विज्ञान तथा प्रविधि मन्त्री महावीर पुनले जेन–जी युवाहरुलाई आफ्नो गाउँ फर्केर सक्रिय हुन र आफ्नो माग पूरा गर्न आग्रह गर्नुभएको छ। सोमबार सिंहदरबारस्थित मन्त्रालयमा जेन–जी २.० ले बुझाएको ज्ञापन पत्र ग्रहण गर्दै उहाँले कतिपय माग तत्काल पूरा गर्न नसकिने स्पष्ट पार्नुभयो।
मन्त्री पुनले भन्नुभयो, “अब यो तिमीहरुको सबै माग पूरा गर्ने हो भने तिमीहरु आफैँ चुनाव लड्ने, सरकार बनाउने, त्यसपछि कुरा आफैंले गर्ने। यहाँ क्यामेरा तेर्साएर बस्ने होइन। केही माग विचार गर्न सकिन्छ, सबै माग पूरा गर्न सकिँदैन।”
जेन–जीले प्राविधिक शिक्षाका समस्याहरु समाधान गर्न १ हप्ताभित्र अल्टिमेटम दिएको छ। उनीहरुले १६ वर्षमा एसईई पास गरी सीटीईभीटीमा भर्ना भएर देश–विदेशमा काम गर्न र देश विकासमा योगदान गर्न चाहने विद्यार्थीका माग पूरा गर्न आग्रह गरेका छन्। यसै वर्ष, स्टाफ नर्स पढ्न चाहने १० हजार विद्यार्थीलाई अवसर सुनिश्चित गर्न पनि उनीहरुले माग राखेका छन्।
